Assange pritet të ekstradohet në Suedi, ku akuzohet për përdhunim

E përditshmja The Guardian, hapet me titullin "Wikileaks zotohet të nxjerrë dokumenta të tjerë pas moslirimit me kusht të Assange".

Themeluesi i Wikileaks-it që kërkohet në Suedi për hetime në lidhje me akuzat për përdhunim të dy grave, e ka kaluar natën në burgun Wandsworth të Londrës. Gjykatësi Howard Riddle refuzoi t'i jepte atij lirim me kusht, me arsyetimin se zoti Assange nuk do të paraqitej më kur t'i kërkohej një gjë e tillë.

Një grup emrash të njohur, përfshirë regjisorin Ken Loach, gazetarin aktivist John Pilger dhe Jemima Khan, ish-gruan e lojtarit të njohur të kriketit, Imran Khan, kanë mobilizuar një fond prej 180 mijë stërlinash për të siguruar lirimin me kusht të zotit Assange, por nuk kanë arritur ta bindin gjykatën.

Rasti ndaj Julian Assange pritet të rishikohet në të njëjtën gjykatë të Londrës më 14 dhjetor.

The Times përcjell kundërshtimin e bërë në emër të autoriteteve suedeze për lirimin me kusht të zotit Assange: Ai ka një stil 'nomad' jetese, njoftohet të ketë kërkuar azil në Zvicër, ka mundësi të mobilizojë sasi të mjaftueshme të hollash dhe ka një rrjet ndërkombëtar kontaktesh.

Duke folur për autoritetet suedeze, Gemma Lindfield, ka thënë se në fakt nuk ka asnjë të dhënë zyrtare për vetë hyrjen e zotit Assange në Britani.

The Times citon gjykatësin Howard Riddle të ketë thënë se arrestimi i zotit Assange 'nuk ka të bëjë me Wikileaks-in'.

The Independent hapet të mërkurën me një foto të themeluesit të Wikileaks-it pranë gjykatës në Londër. "Assange mund të dalë në gjyq për spiunazh në Shtetet e Bashkuara", është titulli i kryeartikullit.

Gazeta shkruan se sipas burimeve diplomatike, tashmë kanë filluar bisedimet informale mes zyrtarëve amerikanë dhe atyre suedezë në lidhje me mundësinë e ekstradimit të 39 vjeçarit Assange në Shtetet e Bashkuara.

Të martën, sekretari amerikan i mbrojtjes, Robert Gates e përshkroi si 'lajm të mirë' arrestimin e zotit Assange. Departamenti Amerikan i Drejtësisë, shkruan The Independent, po shqyrton mundësinë e ndjekjes penale të zotit Assange me akuzat për spiunazh, për shkak se faqja e tij e internetit ka publikuar dokumenta sekrete të diplomacisë amerikane.

The Financial Times sjell zotimin e Wikileaks se arrestimi i themeluesit nuk do ta ndalojë vazhdimin e publikimit të dokumentave të tjerë që kanë ekspozuar mënyrën e funksionimit të brendshëm të diplomacisë amerikane.

Dokumentat e botuara nga Wikileaks, kujton The Financial Times, janë kritikuar nga qeveritë anembanë botës dhe vlerësuar nga aktivistët për lirinë e informacionit.