E përditshmja Financial Times njofton se të dy vendet po i afrohen momentit kur do të kërkojnë ndihmë ndërkombëtare.

Takimi i ministrave, shkruan gazeta, zhvillohet në një kohë kur ka sinjale se bashkimi monetar është i përçarë përsa i takon përpjekjeve që po bën Banka Qendrore Evropiane për ta detyruar Irlandën që të marrë ndihmë.

Ndërkohë ajo shkruan se ministri i Financave i Portugalisë ka deklaruar se investitorët besonin se Lizbona duket se do të detyrohet të kërkojë ndihmë emergjente për shkak të situatës së nderë të tregjeve financiare.

Edhe Guardian ia kushton kryeartikullin situatës financiare në Irlandë dhe presionit që po i bëhet Dublinit për të pranuar një plan shpëtimit të BE-së ose Fondit Monetar Ndërkombëtar, duke thënë se qeveria irlandeze ka vetëm 24 orë për të marrë një vendim.

Presion

Gazeta shkruan se presioni mbi Dublinin është shtuar nga frika se kriza e sektorit të paralizuar financiar i Irlandës mund të përhapet në vendet më të dobëta të eurozonës.

"Kriza e borxheve të Irlandës kërcënon të përhapet në mbarë Evropën," shkruan Times në kryeartikullin e saj.

Gazeta njofton se po zhvillohen ndërkohë bisedime në nivel të lartë mes presidentit të Komisionit Evropian, Jose Manuel Barroso dhe komisionerit të Be-së për Ekonominë, Olli Rehn.

Times shkruan se Dublini po i reziston thirrjeve për të marrë ndihmë financiare, pasi ajo do të kompromentonte pavarësinë e vendit dhe do të bënte që Franca dhe Gjermania të vendosnin taksa më të larta ndaj vendit.

"Euro e rrethuar pasi Portugalia shtyp butonin e panikut," është titulli i kryeartikullit të së përditshmes tjetër Daily Telegraph.

"Euro po përballet me një krizë të paprecedentë" pasi një vend tjetër, Portugalia, ka lënë të kuptohet se ishte 'në rrezik të madh' për të kërkuar ndihmë financiare nga jashtë, shkruan gazeta.

"Irlanda në buzë të greminës," është kryeartikulli dramatik i gazetës Independent.

Ndërkohë, Financial Times shkruan dhe për premtimin e Greqisë për t'iu përmbajtur planit të saj për reduktimin e deficitit buxhetor.

Ishte pikërisht kriza e borxheve në Greqi një vit më parë ajo që pothuajse çoi deri në shkatërrimin e euros.

FT shkruan se autoritetet greke reaguan pas njoftimeve të agjensisë statistikore të BE-së, Eurostat, se deficiti buxhetor i Greqisë këtë vit mund të jetë shumë më i madh nga parashikimet.

Problemet e Berlusconit

Ndër të tjera, FT i kushton vëmendje dhe zhvillimeve në skenën politike të Italisë, pasi ish-aleati i kryeministrit Berlusconi, Gianfranco Fini vendosi që të tërheqë ministrat e tij nga qeveria.

Z. Berlusconi nuk ka më shumicën në senat. Nëse ai humbet një mocion votëbesimi në dhjetor, atëherë Italia ndoshta do të jetë në rrugën drejt zgjedhjeve të përgjithshme në fillim të 2011-ës, shkruan gazeta.

"Silvio Berlusconi: Pse ky njerë është ende në pushtet?" dhe "si mund ta heqë Italia qafe atë?" këto janë pyetjet për të cilën tenton që të japë një lloj përgjigje e përditshmja Guardian.

E vetmja mënyrë, është njëra nga përgjigjet në një artikull të gjatë në suplementin e gazetës, është që ai 'ose të vdesë, ose që vendi të kryejë një de-berluskonifikim të thellë dhe pragmatik, një përpjekje për t'iu kthyer realitetit pas 20 vjetëve të shpëlarjes së trurit" që ai ka bërë përmes televizionit.