Dhuna gjatë protestave të studentëve është në të gjitha faqet e para me pamje të një demonstruesi duke thyer një dritare të Millbank Tower, ku ndodhet selia e partise konservatore në pushtet.

E përditshmja The Daily Mail thotë se militantët nga grupe të së majtës ekstreme keqperdorën protestat e grupeve studentore dhe të rinjve kryesisht nga klasa e mesme.

Gazeta me më se shumti lexues në Britani , The Sun ka titullin "Pa tru", duke treguar pamjet nga trazirat me titujt si banditët që morën drejtimin e protestës dhe me një foto të shefes së policise duke e akuzuar atë për mungesë parashikimi të një problemi të tillë.

Një e përditshme tjetër The Guardian thotë se policët nuk e kishin pritur një shkallë të tillë të dhunës.

Ndërsa për gazetën The Independent trazirat shënuan fundin e konsensusit që mbante koalicionin qeverisës mes konservatorëve dhe liberal-demokratëve.

Qellimi i protestës është që të dobësojë argumentat në favor të financimit të arsimit të lartë dhe jo që ti avanconte ato, thotë, The Daily Express.

Ndërsa një e përditshme tjetër The Daily Mirror, thotë se trazirat vetëm që kanë devijuar vëmendjen e publikut nga çështja e pagesava për studime e fëmijëve të familjeve me të ardhura të mesme dhe të ulëta.

Ajo thotë se shumica e britanikëve do të jenë të neveritur nga sjellja e disa prej protestueve.

Sipas të përditshmes The Times, ministrat janë duke vëzhguar me kujdes të veçantë nëse këto trazira përfaqësojnë një ndryshim në disponimin e elektoratit.

Ndërsa The Guardian thotë se ministrat në të dyja partitë në koalcion janë tronditur nga disa nga skenat më të dhunshme në rrugët e Londrës që nga trazirat e taksave të vitit 1990-të.

Një editorial në këtë gazetë thotë se studentët që marshuan dje në rrugët e Londrës ishin të veshur mirë dhe disa prej tyre me shalle me simbole të Universiteteve nga Oxfordi apo Kembrixhi.