Karzai pranoi se merrte fonde nga Irani

Nga zhvillimet ndërkombëtare, shumica e gazetave i kushtojnë vëmendje pranimit nga ana presidentit afgan, Hamid Karzai se kishte marrë para nga Irani.

Presidenti afgan tha të hënën se Irani i kishte dhuruar, një a dy herë në vit, fonde që kapin vlerën deri në 700 mijë euro fqinjit të tij për të "promovuar marrëdhënie të mira".

Times shkruan se deklarata dëmton besueshmërinë e Karzait si aleati kryesor i Perëndimit në luftën kundër talebanit.

Ndërsa Guardian shkruan në faqen e parë se deklarata e Karzait më në fund zbulon misterin e financimit të zyrës së persidentit afgan.

Prej kohësh, shkruan gazeta, mendohej se Karzai kishte fonde jo të vogla, të cilat i shpenzonte për t'u dhënë para të thata, makina apo dhurata të tjera, aleatëve të tij politike.

Trupa të BE-së në Greqi

	Nga Greqia hyjnë 80 përqind e azilkëkuesve

Financial Times shkruan në faqet e saj të brendshme një artikull rreth vendimit të BE-së për të dërguar trupa në kufirin mes Greqisë dhe Turqisë për të ndihmuar autoritete greke në luftën kundër emigrantëve ilegalë.

"Është hera e parë që BE-së i është dashur të ndërhyjë dhe të dërgojë një ekip për të siguruar një kufi të BE-së," shkruan gazeta dhe shton se vendimi pason shtimin e ndjeshëm të azilkërkuesve që kërkojnë të hyjnë në bllok përmes Greqisë.

Guardian shkruan se azilkërkuesit që hyjnë nga Greqia, përbëjnë 80 përqind të të gjithë azilkërkuesve që hyjnë në BE.

Gazeta njofton se forca e armatosur, e përbërë nga roje kufitare të vendeve të tjera evropiane, pritet të mbërrijë në Greqi brenda pak ditësh.

Ajo nënvizon dhe faktin se kushtet që ofrojnë autoritetet greke për azilkërkuesit që mbërrijnë në vend "e turpërojnë Greqinë" dhe kujton deklaratën e raporterit të OKB-së për torturën, Marfred Novak javën e kaluar që i përshkroi ato si "çnjerëzore".

"Obama slloven"

Independent në faqen e saj ndërkombëtare shkruan për "kryetarin e parë zezak të bashkisë në Evropën Lindore".

Mjeku Peter Bossmann, nga Gana me origjinë, fitoi zgjedhjet lokale në qytetin Piran, në Slloveni. Gazeta shkruan se ai tani po njihet si "obama slloven".

"Fitorja ime tregon nivelin e lartë të demokracisë në Slloveni,"deklaroi Bossmann para se të shtonte se kishte rënë në dashuri me vendin ku shkoi për të studiuar në vitet '70.

Gazeta shkruan se historia e tij ka pushtuar imagjinatën e shumë sllovenëve.

Në faqet lokale të lajmeve, shkruan gazeta, pati nga ata që e përshkruan zgjedhjen e tij 'si një zhvillim të rëndësishëm në vend' dhe 'si një ngjarje tejet simbolike'.

"Ne provuam se këtu ka tolerancë", citon gazeta një mesazh që i është dërguar kryetarit të ri të bashkisë përmes një pjesëtari të rrjetit shoqëror Facebook.

'Vdekja' e kasetofonit

Në njën zhvillim tjetër, gazeta Times sot shënon "vdekjen" e kasetofonit.

Firma japoneze Sony, ka vendosur ta ndërpresë prodhimine tyre pas 30 vjetësh.

Times në një artikull, i bën homazh Walkman-it në botën e sotme të Ipod-it dhe mp3-shit.

Kasetat, shkruan gazeta, ishin mes të tjerash, mënyra se si muzika Perëndimore gjeti rrugën drejt murit të Berlinit dhe vendeve të ish-bllokut komunist.