E përditshmja Daily Telegraph thotë se gjenerali Richards është njeriu më i përshtatshëm për një punë kaq të vështirë.

Një e përditshme tjetër Sun thotë se gjenerali Richards është një ushtarak që mendon për ushtarët.

Daily Mail thotë se ai është një njeri i besuar si nga politikanët ashtu edhe nga trupat ushtarake që ndodhen në vijën frontale.

Financial Times gjithashtu thotë se Gjenerali Richards nuk do të hezitojë që të thotë atë që mendon.

Ndërsa Times thotë se gjenerali Richards ka reputacionin e një zyrtari ushtarak që flet të vërtetën por gjithashtu paralajmëron atë se ndodhet përballë një beteje të vështirë për të fituar besimin tek forcat ajrore dhe ato detare.

E përditshmja Times në një artikull në faqen e parë thotë se Europa e paralajmëron Presidentin Obama se marrëdhëniet mes tyre nuk është duke funksionuar siç duhet.

Bëhet fjalë për kritikat nga presidenti i Komisionit Europian, Jose Manuel Barroso, i cili ka thënë se marrëdhënjet mes Europës dhe Shteteve të Bashkuara nuk janë duke përmbushur potencialin që kanë.

Zoti Barroso e tha këtë në një intrvistë për të përditshmen Times.

E përditshmja Guardian fokusohet në një hetim që ka urdhëruar kryeministri britanik David Cameron rreth akuzave për përfshirje të forcave britanike në rrëmbimin dhe torturimin e shtetasve britanikë që është dyshuar se mund të jenë pjesë e rrjetit të al-Kaidës, menjëherë pas sulmeve të 11 shtatorit në vitin 2001.

Daily Mail ka në faqe të parë kryeministrin britanik Cameron i cili ka kritikuar qytetarët britanikë që i kanë bërë homazhe vrasësit Raoul Moat i cili pasi kishte vrarë një person dhe plagosur një polic vrau veten pasi ishte rrethuar nga policia.

Bëhet fjalë për mijëra homazhe që i janë bërë atij në faqen e tij në rrjetin social Facebook.

Për të përditshmen Daily Mirror ky është realiteti i trishtuar sepse një pakicë e shqetësuar e qytetarëve gjithmonë do të anojë nga kriminelët.

Në një ngjarje tjetër Times njofton se ambasadat britanike dhe komisionet e larta ka të ngjarë të preken nga shkurtimet në fondet publike të njoftuara kohë më parë nga qeveria e re britanike.

Sipas saj qindra diplomatë të lartë pritet të humbasin vendet e tyre të punës në dobi të stafit vendor i cili supozohet të jetë shumë më i lirë se sa stafi nga Britania e Madhe.