Kërkohet të luftojë korrupsionin

"Këshilltarët e Obamës në luftë për shkak të konfliktit në Afganistan"- është kryeartikulli i gazetës THE INDEPENDENT që boton hollësi nga një dokument në tëcilin kritikohet strategjia e SHBA-ve në Afganistan.

Në të vërtetë, sipas gazetës, problemi kryesor në Afganistan nuk është mungesa e trupave, por mungesa e strategjisë së duhur. Strategjia e Perendimit në këtë vend duhet të ndryshohet dhe duhet harruar ëndrrat për shndërrimin e e këtij vendi në demokraci shembullore.

Objektivi kryesor tani duhet të jetë stabilizimi i gjendjes në Afganistan që, në një afat të mesëm, do të shpiente drejt tërheqjes së trupave të huaja. E ardhmja e Afganistanit nuk varet vetëm nga numri i mjaftueshëm i trupave në terren, por esenciale është të shikohet se si shfrytëzohen këto trupa. Epërsi e tyre, thotë gazeta, duhet të jetë patjetër mbrojtja e popullsisë nga mësymjet e talebanëve dhe vendosja e shtetit që vetë të kujdeset për sigurinë e tij.

Në të njëjtën kohë, gazeta thotë se është i domosdoshëm edhe reformimi i pushtetit. Presidenti Hamid Karzai ndoshta nuk është as më shumë e as më pak i korruptuar se liderët e tjerë të rajonit, por ata nuk i mbështesin 100 mijë trupa të NATO-s.

Ekziston mendimi se presidenti amerikan Obama po zvarrit vendimin për dërgimin e trupave shtesë në Afganistan për të ushtruar presion mbi Hamid Karzain që të shkarkojë ministrat dhe zyrtarët e korruptuar.
Një qëndrim i tillë, përfundon gazeta, është i arsyeshëm sepse Perendimi kurrë nuk do të ketë partner të pagabueshëm në Kabul, por ai sado-kudo duhet të jetë i besueshëm.

Me Afganistanin merret edhe e përditshmja tjetër londeze THE GUARDIAN. Gazeta citon Dejvid Kilkulenin, një ndër eskpertët më të njohur që merret me çështjen e militantëve dhe njëherësh këshilltar i qeverisë britanike dhe asaj amerikane, sipas të cilit "hezitimi i Obamës që të dërgojë më shumë trupa në terren, jo vetëm që po i brengos aleatët amerikanë, por krijon pasiguri të cilën talebanët mund ta shfrytëzojnë".

Ndërkaq, THE TIMES merret me ndryshimin e klimës, por nga këndi britanik.

Britania e Madhe, thotë gazeta, nuk disponon kapacitete teknike dhe prodhuese për të arritur pakësimin e dëshiruar të emetimit të dioksidit të karbonit. Qeveria e kryeministrit Brown ka marrë përsipër detyrimin ligjor të ul emetimin për 80 për qind deri në vitin 2050, por nuk ka shpjeguar se si do ta arrijë këtë, shkruan gazeta duke ofruar rezultatet më të fundit të studimit të Institutit të Inxhinierëve të Makinerisë, sipas të cilëve ky objektiv është ëndërr dhe nuk ka kurrfarë mbështetjeje në realitet.

Do të duhej të ndërtohen 30 centrale bërthamore deri në vitin 2015, kurse qeveria ka shpallur se shpreson se kompanitë private do të ndërtojnë dhjetë deri në vitin 2025. Së këndjemi thotë kjo e përditshme, qeveria duhet të pranojë realitetin e hidhur se objektivi i uljes së emetimit të dioskidit të karbonit për 80 për qind, nga Ligji mbi Ndryshimin e Klimës, është i parealizueshëm.

Sipas parashikimeve të Institutit të Inxhinierëve të Makinerisë kjo eventualisht mund të arrihet në vitin 2100. Gazeta citon drejtorin e këtij Instituti sipas të cilit Britania duhet të përqafojë "mentalitetin luftarak" dhe qytetarët e saj duhet të konsumojnë me kujdes energjinë, njësoj sikurse u kujdesën për konsumimin e ushqimit gjatë Luftës së Dytë Botërore.