Ka pasur kritika se trupat britanike nuk po mbështeten si duhet

Gazeta THE TIMES shkruan se Shtetet e Bashkuara duan më shumë trupa të NATO-s për një ofensivë të re.

Sipas gazetës presidenti Obama kërkon që vendet aleate, kryesisht ato evropiane, të dërgojnë afro 4 mijë trupa shtesë në Afganistan.

Gazeta thotë se zoti Obama pritet të konfirmojë dërgimin e 35 mijë ushtarëve amerikanë shtesë në Afganistan, që të gjithë të përgatitur për veprime luftararake.

Kjo gazetë shkruan se, momentalisht, vetëm dy anëtare të NATO-s, Britania dhe Turqia, kanë thënë se do të shtojnë numrin e trupave të tyre në Afganistan dhe 'zor se do të ketë ndonjë vend tjetër'.

Gazeta THE INDEPENDENT boton në faqe të parë një artikull me titullin " Votuesit thonë se lufta në Afganistan e dëmton sigurinë".

Gazeta i referohet një sondazhi të saj sipas të cilit katër në pesë britanikë nuk besojnë se përfshirja e Britanisë në luftën në Afganistan po e shton sigurinë në rrugët e Britanisë nga kërcënimi i sulmeve të mundshme terroriste.

Gazeta THE GUARDIAN ndalet në debatin që ka shkaktuar letra e ngushëllimit që kryeministri britanik Gordon Brown i dërgoi nënës së një ushtari britanik që humbi jetën në Afganistan.

Gazeta shkruan se zoti Brown i ka kërkuar falje nënës së ushtarit të vrarë për gabimet në letrën e tij të ngushëllimit.

Sipas gazetës, zoti Brown në mënyrë indirekte iu referua dhimbjes që ai vetë përjetoi kur humbi vajzën e tij në përpjekje për t'i bindur kritikët e tij se ai e kupton shumë mirë dhimbjen e thellë që ndjejnë familjarët e ushtarëve që kanë humbur jetën në Afganistan.

Në këtë çështje ndalet edhe gazeta THE DAILY TELEGRAPH.

"Nëna që është në zi akuzon Brown-in ndërsa gjashtë trupa të tjerë pa jetë kthehen në atdhe", shkruan kjo gazetë.

Ajo citon nënën e ushtarit të vrarë, Jacqui Janes, se djali i saj do të kishte shpëtuar nëse trupat britanike do të kishin më shumë helikopterë në terren.

THE FINANCIAL TIMES shkruan se, përballë perceptimit se mbështetja për luftën në Afganistan po bie, kryeministri Gordon Brown po kërkon ta bindë publikun që ta kuptojë lidhjen mes luftës që po zhvillohet në një vend të largët si Afganistani dhe kërcënimit që i kanoset Britanisë nga terrorizmi.