Kryeministri britanik pritet të paraqesë vlerësimet e tij me qëllim të sigurimit të mbështetjes për luftën në Afganistan ku vetëm gjatë javës së fundit humbën jetën shtatë ushtarë britanikë.

THE DAULY TELEGRAPH shkruan se Brown për herë të parë do të thotë botërisht se është reale mundësia e disfatës në Afganistan. Kryeministri, njofton gazeta, do të thotë se lufta afgane nuk është punë zgjedhjeje, por nevojë që të sigurohet vendi dhe prandaj do të rikonfirmojë vendosmërinë e Britanisë dhe të Perendimit që të qëndrojnë në këtë konflikt.

Pritet që kryeministri Brown t'i shtrojë presidentit Karzai kushtet për vazhdimin e mbështetjes dhe kjo para së gjithash ka të bëj me vendosjes së sigurisë së dukshme në vend dhe me ç'rrënjosjen e korrupsionit.

FINANCIAL TIMES sjell rezultatet e sondazhit të opinionit publik, sipas të cilit mbështetja për luftën në Afganistan është në rënie të shpejtë.

Një e treta e britanikëve mendojnë se ushtarët e tyre duhet të tërhiqen menjëherë nga Afganistani, kurse gjysma e të anketuarëve besojnë se fitorja në Afganistan nuk është e mundshme.

THE INDEPENDENT njofton për pakënaqësinë në rritje për shkak të, sikurse thuhet, pavendosmërisë fatale të presidentit amerikan Barak Obama lidhur me dërgimin e 40 mijë ushtarëve shtesë në Afganistan.

Gazeta shkruan se në Londër dhe metropolet e vendeve të tjera anëtare të NATO-s po rritet brengosja për kohën që i duhet presidentit amerikan të vendosë për strategjinë e re në Afganistan.

Gazeta transmeton deklaratat e zyrtarëve britanikë se pa vendimin e shpejt të Obamës "lufta mund të humbet në frontin vendor" për shkak të pakënaqësisë së publikut. Kjo e përditshme thotë se në luftë nevojitet mentalitet luftarak dhe konform kësaj vendimet duhet të merren shpejt.

THE GUARDIAN shkruan në faqen e parë se në raportin sekret të OKB-së për Iranin thuhet se në vend janë kryer prova të rejasi pjesë e projektit të debatueshëm bërthamor të Teheranit. Në artikullin që paraqitet si ekskluziv gazeta thotë se ekziston droja se Teherani tashmë ka komponentet kryesore për vendosjen e bombave në projektile. Nga Irani tani kërkohet t'i shpjegojë provat që sugjerojnë se shkencëtarët iranianë kanë kryer eksperimete të tilla.

E përditshmja tjetër londineze THE TIMES merret me një temë krejtësisht tjetër. Gazeta shkruan se në Britani do ketë orë detyrimore të edukatës seksuale për të gjithë personat mbi moshën 15 vjeçe.

Edukata seksuale do të bëhet kështu e obligueshme për të gjithë nxënësit, gjë që është pritur me indinjatë nga grupet fetare. Ato thonë se hapi është në kundërshtim me të drejtën - fëmijët të edukohen në pajtim me fenë e prindërve të tyre.

Autoritetet paralajmërojnë se nxënësit të cilët për arsye fetare ose të tjera do të pengohen të marrin pjesë në mësim do të llogariten sikur të kenë ikur nga orët dhe ndoshta edhe do të dënohen!

E njëjta gazetë merret edhe me manifestimet për shënimin e 20 vjetorit të rënies së Murit të Berlinit.

Kjo e përditshme kritikon vendimin e autoritetetve të kryeqytetit gjerman që në përvjetorin e shembjes së një muri, ngritën një tjetër me rastin e mbajtjes së koncertit gratis të grupit të njohur irlandez U2.

Mundësi të pjesëmarrjes patën vetëm ata dhjetë mijë njerëz të cilët kishin siguruar bileta, por edhe ata u desh të kalojnë, sikurse thotë gazeta, nëpër "pika kontrolli" për të mbërritur në vendin ku u mbajt koncerti, në qendër të Berlinit.