Tony Blair është një prej emrave jozyrtarë për president të BE-së

Në faqet e saj ndërkombëtare e përditshmja GUARDIAN, shkruan se SHBA-ja po e lë mënjanë debatin për klimën megjithë thirrjen e bërë nga kancelarja gjermane Angela Merkel.

Sipas gazetës, negociatorët ndërkombëtarë, humbën një prej elementeve kyçe për një marrëveshje të suksesshme lidhur me ngrohjen klimatike, pasi udhëheqësit demokratë në kongres, përjashtuan mundësinë e kalimit të një ligj për klimën para vitit 2010.

Angela Merkel shfrytëzoi një fjalim historik në kongresin amerikan për t'i bërë thirrje Amerikës që të veprojë për klimën, duke thënë se suksesi në konferencën e Kopenhagës do të varej nga vullneti i të gjitha vendeve për të respektuar reduktimin e emetimeve.

Por në të njëjtën faqe, e përditshmja GUARDIAN shkruan për një studim të ri që thotë se është mbivlerësuar efekti që ka patur shkatërrimi i pyjeve tropikale mbi emetimet e dioksidit të karbonit.

Humbja e sipërfaqeve pyjore në vende si Brazili dhe Indonezia, presupozohet se ka shkaktuar 20 për qind të emetimeve të përgjithshme në botë që shkaktohen nga aktiviteti njerëzor dhe që është më shumë se sa shkaktohen nga sistemi i transportit.

Por studiuesit në Universitetin VU në Amsterdam kanë arritur në përfundimin se emetimet nga shpyllëzimet janë në masën 12 për qind.

Ulja e emetimeve që shkaktohen nga humbja e sipërfaqeve pyjore është një çështje që diskutohet edhe në një konferencë këtë javë në Barcelonë.

Libri më i fundit i një prej aktivistëve më të njohur për klimën, ish zv/presidenti amerikan Al Gore, ka shkaktuar mjaft debat.

GUARDIAN shkruan se ky libër ka ngritur pyetje nëse investimet e zotit Gore në teknologitë ekologjike përbëjnë një konflikt interesash.

Thirrja e fundit e zotit Gore për të vepruar për të zgjidhur krizën klimatike shkaktoi debat lidhur me përfshirjen e tij në firma që investojnë në teknologji të gjelbra.

Al Gore, shkruan GUARDIAN ka investuar në një kompani që ka kontratata me shërbime që javën e kaluar fituan 560 milion dollarë subvencione nga qeveria amerikane.

Pas ratifikimit të Traktatit të Lisbonës nga vendi i fundi i BE-së, Çekia këtu në Britani vëmendja është përqëndruar tek Tony Blair dhe David Cameron.

DAILY TELEGRAPH shkruan se fuqia e Britanisë për të qeverisur veten është duke u dorëzuar gjithnjë e më shumë tek Brukseli pas ratifikimit të Traktatit.

Ratifikimi nga ana e çekëve i bën konservatorët britanikë që të braktisin premtimin për të mbajtur një referendum në Britani për Lisbonën.

Një prej zyrtarëve të lartë të konservatorëve William Hague e quajti të martën një "ditë të keqe për demokracinë britanike".

Ndërsa lideri i partisë David Cameron u akuzua se hoqi dorë nga premtimi për një referendum duke i tradhëtuar britanikët, shkruan gazeta.

Zoti Cameron do të paraqesë planet për alternativën konservatore për të rinegociuar pjesë të anëtarësisë britanike në Evropë, për të rikthyer kontrollin mbi ligjet e punësimit dhe ato sociale.

THE TIMES shkruan për një "agim të ri për Evropë" dhe fillimin e një gare për të gjetur një president.

Udhëheqësit evropianë nuk humbën kohë në fillimin e procesit për të zgjedhur presidentin e ri të tyre, nga një mori emrash, ku janë edhe kryeministri suedez, Frederik Reifeldt dhe ish kryeministri britanik, Tony Blair.

Shanset e zotit Blair u dëmtuan javën e kaluar kur vendet e vogla të kërkuan një kryetar dhe jo një shef.

FINANCIAL TIMES citon burimet të veta, që thonë se ish kryeministri britanik, Tony Blair ka bërë përpjekje për të ringjallur perspektivën për të qënë president i BE-së duke bërë lobing tek udhëheqësit e Francës dhe Gjermanisë.

Vendimi i zotit Blair për ta bërë këtë fushatë jozyrtare, shkruan gazeta, erdhi kur u shtuan zërat se shumica e qeverive të BE-së kërkonin që posti të shkonte tek një vend më i vogël se Britania.