Abdullah: "Tërheqja nga raundi i dytë nuk ishte vendim i lehtë"

THE TIMES boton një atikull me titullin "Zgjedhjet presidenciale zhyten në kaos, ndërsa rivali i Karzait thotë se nuk do të marrë pjesë"

Gazeta shkruan se pas kësaj deklarate procesi zgjedhor është futur në një rrugë pa krye teksa zyrtarër që merren me procesin zgjedhor thonë se raundi i dytë duhet të zhvillohet edhe me një kandidat, ndërsa diplomatët perëndimorë kërkojnë anullimin e këtij raundi, për shkak të shqetësimit se pjesëmarrja mund të jetë e ulët.

Sipas gazetës, ky hap synon të shtojë trysninë mbi presidentin Karzai që ai të arrijë një marrëveshje me zotin Abdullah si e vetmja rrugë për ta nxjerrë vendin nga kriza që po vazhdon që prej dy muajsh.

"Kaos në Afganistan ndërsa Abdullah tërhiqet nga zgjedhjet" - është ky titulli i së përditshmes THE INDEPENDENT.

Sipas gazetatës Uashingtoni është në dilemë se çfarë duhet bërë pasi raundi i dytë tani do të jetë vetëm me një kandidat.

Gazeta shkruan se Shtetet e Bashkuara luajntën një rol kyç për ta bindur presidentin Karzai që të zhvillonte një raund të dytë zgjedhjesh.

Kjo gazetë citon Sekretaren Amerikane të Shtetit, Hillary Clinton, se largimi nga gara i njërit prej kandidatëve nuk ka të bëjë me legjitimitetin e zgjedhjeve, por me një zgjedhje personale.

Gazeta vëren se zoti Abdullah u tërhoq nga gara pasi dështuan përpjekjet për arritjen e një marrëveshjeje politike mes tij dhe presidentit Karzai për ndarjen e pushtetit.

THE GUARDIAN shkruan se Shtetet e Bashkuara dhe Britania po përpiqen që ta portretizojnë vendimin e zotit Abdullah për t'u tërhequr nga raundi i dytë i zgjedhjeve presidenciale, si gjest të unitetit kombëtar.

Gazeta shkruan se amerikanët patën shpresuar se zgjedhjet në Afganistan do të nxirrnin një partner të fortë dhe të besueshëm në zbatim të strategjisë kundër militantëve talebanë.

"Përkundrazi - shkruan gazeta - Shtetet e Bashkuara dhe Britania duhet të merren me një qeveri me legjitimitet të cunguar në kushtet kur edhe opinionin publik në këto dy vende po kthehet gjithjë e më shumë kundër luftës.

THE FINANCIAL TIMES hapet me një foto të zotit Abdullah Abdullah në momentin e deklarimit për t'u tërhequr nga raundi i dytë i zgjedhjeve presidenciale.

Gazeta e citon atë të ketë thënë se qeveria afgane nuk kishte ndërmarrë masat e kërkuara prej tij për mospërsëritjen e mashtrimeve në zgjedhje. "Nuk e kam pasur të lehtë marrjen e një vendimi të tillë", ka thënë zoti Abdullah në një fjalim që gazeta e cilëson si emocional. Ai ka shtuar se nuk inkurajon bojkotimin e zgjedhjeve dhe as nuk u bën thirrje përkrahësve të tij të dalin në protesta.

THE DAILY TELEGRAPH shkruan se Hamid Karzait iu dorëzua mandati i dytë në postin e presidentit të Afganistanit, ne momentin kur rivali i tij u tërhoq nga raundi i dytë i zgjedhjeve, duke sinjalizuar kështu se ishte i gatshëm të nënshkruante një marrëveshje. Zoti Abdullah Abdullah citohet të ketë thënë se "nuk do t'i mbyllë asnjë derë" zotit Karzai.

Gazeta citon një diplomat europian të ketë thënë se, gjatë ditëve të ardhshme, do të ndërmerren hapa për ta inkurajuar zotin Abdullah të heqë dorë nga sfida ligjore ndaj zgjedhjeve dhe që gjykata supreme e vendit ta shpallë të panevojshme mbajtjen e zgjedhjeve me një kandidat.