E përditshmja The Guardian thotë se udhëheqësit ushtarak britanik kanë mbështetur planet e zotit Brown për të dërguar 500 trupa shtesë në Afganistan.

Zoti Brown u ka thënë deputetëve britanik në parlament se vendimi i tij është konsistent me atë që amerikanët do të vendosin çfarë sugjeron se pritet që edhe presidenti Obama do të bije dakort për të rritur numrin e trupave amerikane në Afganistan.

Kryeministri Brown përshkroi objektivat britanik si të qartë dhe të fokusuar në parandalimin e sulmeve të mundshme të Al Kaidës mbi Britaninë.

Zoti Brown tha se në Afganistan duhet një strategji e re për të rindërtuar vendin si dhe për t'i përgatitur forcat afgane duke i stërvitur për të marrë përsipër një rol më të madh në operacionet ushtarake në këtë vend.

E përditshmja The Independent mendon se qëndrimi i zotit Brown i ka të gjitha tiparet e një operacioni në pritje - në pritje të shpalosjes së planeve të presidentit Obama rreth përforcimeve amerikane në Afganistan.

Gazeta thotë se Brown është sulmuar nga ish zyrtarë laburist se vendimi i tij për të miratuar dërgimin e trupave shtesë në Afganistan është i vonuar.

Ish sekretari britanik i mbrojtjes, John Hutton tha se këto perforcime do të duhej të ishin vendosur dhe dërguar në pranverë kur ai si sekretar i mrbojtjes i kishte kerkuar ato.

Zoti Hutton tha se nuk duhet bërë kompromise me numrin e forcave që dërgohen në Afganistan sepse çmimi i humbjes atje do të ishte shumë i lartë.

E përditshmja The Daily Telegraph thotë se është e padrejtë që Britania të mbahet pezull nga Shtetet e Bashkuara rreth planeve për dërgimin e trupave shtesë në Afganistan.

E përditshmja The Daily Mirror thotë se trupat duhet të jenë të vetëdijshme se janë duke luftuar për demokraci prandaj edhe zgjedhjet presidenciale të debatueshme në Afganistan ose duhet të përsëriten ose duhet të krijohet një qeveri e bashkimit kombëtar.

E përditshmja The Times thotë se është në favor të dërgimit të trupave shtesë në Afganistan por se nuk është mirë se ato do të dërgohen vetëm pas disa javësh.

Edhe The Times citon ish sekretarin britanik të mbrojtjes, John Hutton të ketë thënë se nëqoftëse kemi të bëjmë me një mision kombëtar atëherë duhet bërë gjithëçka për të siguruar fitore të plotë.