BAE është kompania më e madhe ushtarake në Britani

"Agjencia britanike e luftës kundër mashtrimit i ka kërkuar Prokurorisë së Përgjithshme që kompania e prodhimit ushtarak BAE të ndiqet penalisht për dhënie ryshfetesh", shkruan THE GUARDIAN në faqe të parë.

Gazeta vë në dukje se ky hap do të jetë i paprecedentë në Britani po të kihet parasysh se ish-prokurori britaniak, Lordi Goldsmith, nuk kishte mundur ta ndiqte penalisht këtë kompani disa vite më parë, për shkak se çështja kishte një ndjeshmëri të lartë për sigurinë kombëtare.

Gazeta shkruan se agjencia kundër korrupsionit ka kohë që e kërcënon këtë kompani me ndjekje penale, por këtë herë duket se do t'i shkojë çështjes deri në fund.

"Kryeministri Brown nuk reagon ndërsa gjigandi i mbrojtjes akuzohet për ryshfete", shkruan THE TIMES.

Gazeta thotë se zoti Brown duket se do ta lërë prodhuesin më të madh të armatimeve në Britani në mëshirë të gjykatës pas akuzave se ka paguar miliona në ryshfete për të fituar kontrata shitjeje armatishmesh.

Kjo është në ndryshim nga paraardhësi i tij, Tony Blair, që ndërhyri për të ndaluar një hetim për këtë kompani për akuza të ngjashme.

"Thuhet se zyrtarë të kabinetit të kryeministrit e kanë hedhur poshtë një kërksë të kreut të kompanisë për të ndërhyrë në favor të tyre", shkruan gazeta.

"Akuzat për ryshfete mund ta shkatërrojnë kompaninë BAE, shkruan THE INDEPENDENT.

Gazeta shton se kjo kompani mund të ndalohet për të shitur armatime nëse gjendet fajtore se ka dhënë ryshfete.

Edhe kjo gazetë shkruan se kryeministri dhe kryeprokuroria do të hapin rrugën për fillimin e ndjekjes penale për këtë kompani.

Gazeta shktuan se ky hap u mor pasi dështuan bisedimet midis kompanisë BAE dhe agjencisë kundër mashtrimit për të arritur një marrëveshje që kompania të paguante një shumë të caktuar parash si dëmshpërblim.

THE DAILY TELEGRAPH shkruan se Baronesha Scotland është nën presion lidhur me ndjekjen penale të kompanisë BAE, që është gjithashtu edhe një çështje e ndjeshme politike.

Kompania mund të gjobitet deri në 1 miliard stërlina nëse gjendet fajtore.

"Kjo ndjekje penale mund të vërë në pozitë të vështirë qeverinë laburiste", thotë gazeta.

Gazeta FINANCIAL TIMES shkruan se lajmet që prokurori do të shqyrtojë kërkesën e agjensisë kundër mashtrimit për të ndjekur penalisht kompaninë BAE, kanë bërë që aksionet e kompanisë të bien me 4%.

Megjithatë gazeta shkruan se nuk përjashtohet mundësia që të arrihet një marrëveshje në çastet e fundit.