Botuar: E enjte, 16 korrik 2009 - 12:01 CET

E ardhmja e energjisë në Britani

Revolucioni i energjisë së gjelbërt në Britani në fokus të shtypit të sotëm britanik.

E përditshmja The Guardian në faqe të parë sjell titullin Laburistët urdhërojnë revolucionin e energjisë së gjelbërt.

Gazeta thotë se ministri për energji dhe ambient, Ed Milliband ka paraqitur planet e qeverisë për fokusim në energji të ripërtërishme.

Ministri bëri të njohur planin ambicioz në kuadër të zotimeve të Britanisë së madhe për të shkurtuar 34 përqind deri në vitin 2020 emetimin e gazrave që shkaktojnë efektin serë.

Sipas planit Britania do të sigurojë rreth 40 përqind të rrymës elektrike nga fermat me mullinjë të erës dhe nga uzinat bërthamore deri në fund të kësaj dekade.

E përditshmja The Daily Telegraph në të njejtën temë sjell titullin Britania duhet të pajtohet me pushtimin e mullinjve të erës.

Gazeta paralajmëron se së shpejti shumë peisazhe britanike do të kenë në sfond mullinjë të erës me lartësi deri 100 metra - e gjithë kjo në funksion të sigurimit të energjisë së gjelbërt.

Sipas gazetës fatura e energjisë për një familje britanike do të rritet mesatarisht rreth 250 sterlina në vit në mënyrë që të kemi më shumë energji të ripërtërishme, por qeveria thotë se në një plan më afatgjatë të gjithë do të përfitojnë nga kjo.

Edhe e përditshmja Financial Times në temën e energjisë së gjelbërt paralajmëron për rritjen e çmimit të energjisë rreth 17 përqind gjatë kësaj dekade si rezultat i planeve të qeverisë për të zvogëluar dioskid karbonin.

Paralajmërimi bëhet me rastin e shpalosjes së planeve të qeverisë për të luftuar ngrohjen globale dhe për të inkurajuar energjinë e ripërtërishme.