Në Britani kanë vdekur 29 vetë nga virusi

Numri i 65 mijë vdekjeve të mundshme nga infektimi përmendet nga shumë gazeta, por si nënvizon gazeta Guardian, kjo shifër paraqet vetëm skenarin më të keq.

Daily Telegraph në faqen e parë njofton për zhvillimet më të fundit nga ky front: "29 të vdekur dhe dhjetëra në gjendje kritike," shkruan kryeartikulli i gazetës.

Në artikull njoftohet se vetëm gjatë javës së fundit, 55 mijë vetë kanë raportuar simptoma të virusit, 652 prej të cilëve janë mjekuar në spital dhe 53 prej tyre janë në gjendje kritike.

Reputacioni në rrezik

Po kjo gazetë në faqen e parë parashikon që partia Laburiste në pushtet do ta dëmtojë reputacionit e Gjen. Sir Richard Dannatt kur ai të largohet nga posti i Shefit të Shtabit të Ushtrisë britanike.

Arsyeja për këtë është se Sir Richard mendohet se po planifikon një libër, i cili, sipas gazetës, mund 'të dëmtojë' qeverinë për situatën në Afganistan.

Gazetat britanike, mes tyre dhe Guardian, në faqen e parë, i kushtojnë vëmendje funeralit të ushtarit britanik me gradë më të lartë që u vra në krye të detyrës në Afganistan, Kol. Lejt. Rupert Thorneloe.

Të drejtat e njeriut

Një funerali i kushtohet faqja e parë dhe në të përditshmen britanike, Independent, kësaj rradhe në Çeçeni.

Bëhet fjalë për aktivisten e shquar të të drejtat e njeriut Natalia Estemirova, që u vra pasi u rrëmbye nga shtëpia në Grozni.

'Nga përtej varrit: një aktakuzë e fortë ndaj të përkëdhelurit të Putinit dhe regjimit të tij të terrorit," është kryeartikulli i gazetës që shoqërohet në faqen e parë nga fotografia e presidentit çeçen, Ramzan Kadyrov.

Ky është dhe zhvillimi kryesor në faqet ndërkombëtare të së përditshmes tjetër, Times.

Në një artikull nga Çeçenia, gazata shkruan se ndërsa shtohet indinjata për vrasjen e aktivistes së të drejtave të njeriut, akuzat për të po drejtohen nga udhëheqësi çeçen.