Trupat amerikane tërhiqen nga qytetet e Irakut

Gazeta The Times hapet me një foto të policëve irakianë në Qerbela që festojne tërheqjen e amerikanëve. Titulli kryesor i ballinës së gazetës është "Dorëzimi në Bagdad shënohet me parada dhe një bombë". Është fjala për shpërthimin e një autobombe në Kirkuk, një kujtesë për sfidat me të cilat përballen forcat vendase të sigurisë tani e tutje. The Times shkruan se dita e dorëzimit të qyteteve në duart e forcave irakiane të sigurisë ishte një ditë pushimi që njerëzit e kaluan me ndjesinë e triumfit dhe frikës bashkë. Nga frika e bombave, të martën në Bagdad ushtroheshin kontrolle të rrepta të automjevete të parkuara dhe shumë banorë zgjodhën të mos dalin nga shtëpitë.

Në faqen e parë të zhvillimeve ndërkombëtare, The Guardian shkruan për atë që e quan "Paradë e triumfit, teksa irakianët festojnë tërheqjen e trupave luftarake amerikane". Gazeta jep kronologjinë e gjashtë viteve të pushtimit, që filloi në mars të vitit 2003 me sulmet ajrore amerikane dhe përfundoi ditën e fundit të qershorit 2009 me dorëzimin e sigurisë së qyteteve të Irakut tek forcat vendase. Gazeta paralajmëron për vështirësitë me të cilat do të ndeshen këto forca në të ardhmen. Vetëm gjatë dhjetë ditëve të fundit në Irak janë vrarë 250 persona, shumica e të cilëve nga shpërthimi i bombave.

The Daily Telegraph njofton për vrarjen e katër ushtarëve amerikanë gjatë orëve të fundit të operacionit të tyre luftarak, para transferimit të kontrollit të qyteteve në duart e forcave irakiane të sigurisë. Gazeta njofton se ushtarët amerikanë u vranë gjatë një incidenti në Bagdad.

The Financial Times në faqet e zhvillimeve nga bota shkruan se "Grupet e naftës u bëjnë qëndresë kushteve të rrepta të tenderimit" në Irak. Sipas gazetës, vetëm kompania britanike British Petrolium dhe kinezja CNPC i kanë pranuar kushtet shtrënguese të tenderit që synon kthimin e rezervës naftëmbajtëse në Rumaila në prodhuesin e dytë më të madh në botë.

The Independent teksa shënon transferimin e kompetencave për ruajtjen e sigurisë së qyteteve irakiane nga forcat amerikane tek ato irakiane, ndalet në një analizë ekonomike të burimeve të rëndësishme të Irakut. Vendi, shkruan gazeta, është përfshirë në një luftë me kompanitë më të mëdha të naftës në bote për kontratat që, për herë të parë, pritet të gjenerojnë nxjerrjen e sasive më të mëdha të naftës në Irak në 40 vjet. Gazeta shkruan se nga e ardhmja e naftës irakiane, nga mënyra se si do të nxirret dhe menaxhohet ajo, varet e ardhmja e furnizimeve botërore me energji.