Besohet se ofensiva izraelite do të ndalet përkohësisht prej presionit

Disa prej gazetave sugjerojnë se Izraeli mund të pranojë një armëpushim për shkak të rritjes së presionit diplomatik.

E përditshmja THE INDEPENDENT beson se presioni për t'i dhënë fund aksionit ushtarak nuk vjen vetëm nga Be-ja por edhe Uashingtoni.

Duke u përqëndruar në këtë fakt gazeta, THE GUARDIAN, shkon më tej duke sugjeruar se Izraeli është duke konsideruar një ndalim të përkohshëm të bombardimeve.

THE TIMES përqëndrohet tek një tjetër betejë mes Izraelit dhe Hamasit, "lufta e propagandës", përsa i takon opinionit botëror.

THE DAILY EXPRESS boton fotografi që tregojnë tymin që ngrihet mbi qytetin Rafah dhe ndërtesa qeveritare brenda në Gazë, të cilat janë tërësisht të shkatërruara.

Megjithatë e përditshmja THE DAILY TELEGRAPH beson se dy të tretat e kapacitetit ushtarak të Hamasit mbeten të paprekura.

THE DAILY MIRROR sjell perspektivën izraelite me një reportazh nga qytetet izraelite të goditura nga predhat e Hamasit.

Ndërsa FINANCIAL TIMES ka fotografinë e një protestuesi jashtë ambasadës izraelite në Londër.

E përditshmja financiare përqëndrohet në rolin që mund të luajë Turqia në ndërtimin e urave lidhëse për të bashkuar arabët.

Kryeministri Recep Taip Erdogan fillon një turne në vendet arabe në kohën që ministrat e jashtëm të Ligës Arabe mblidhen në Kajro për të diskutuar krizën në Lindjen e Mesme.

Turqia që nuk është anëtare e Ligës, ka patur marrëdhënie të ngushta me Izraelin, por e ndali rolin e saj ndërmjetësues në bisedimet Izrael - Siri dhe shprehu një qëndrim të ashpër kundër sulmeve në Gazë.

Zoti Erdogan viziton Jordaninë, Egjiptin dhe Arabinë Saudite ku do të konsultohet për mënyrat e ringritjes së procesit të paqes, shkruan FINANCIAL TIMES.