Kjo çështje ka shkaktuar kritika të ashpra. THE DAILY TELEGRAPH thotë se ministra e kabinetit qeveritar dhe Kryetari i parlamentit britanik u akuzuan të hënën se ishin duke u përpjekur për të bashkëpunuar lidhur me një qëndrim përsa i takon kësaj çështjeje.

Kryetari i parlamentit pritet që këtë javë të japë sqarime përse u lejua policia të bastiste zyrën e politikanit, Damien Green.

THE DAILY TELEGRAPH shkruan se nga disa informacione të marra nga e-maile të zbuluara, ministrja Harriet Harman planifikonte një takim të fshehtë me përfaqësuesin e parlamentit britanik për të disktuar përgjigjen që do të jepej përsa i takon çështjes së mësipërme.

Zonja Harman që është nënkryetare e partisë Laburiste akuzohet se është përpjekur të influencojë Kryetarin e parlamentit që është vënë nën presion për të dhënë dorëheqjen.

Gazeta thotë se takimi "i fshehtë" ngre pyetje përsa i takon edhe paanshmërisë politike të parlamentit.

Konservatorët thonë se takimi nuk është me vend dhe se parlamenti duhet të veprojë në mënyrë të pavarur nga qeveria për këtë skandali.

Në faqen e komenteve e përditshmja THE FINANCIAL TIMES,ka një shkrim me titull "policia dhe qeveria janë jashtë kontrollit".

Autori i shkrimit vëren se vepra, për të cilën u arrestua politikani i opozitës Damien Green, kishte të bënte me informacione qeveritare që e vinin në pozitë të vështirë ministren e Brendshme, Jacqui Smith.

Ai thotë se nëse do të kishte dalë në gjyq, zoti Green nuk do të ishte dënuar nga juria, për një praktikë që është bërë "e zakonshme" në politikë.

Në këtë koment THE FINANCIAL TIMES kujton se kur ishte në opozitë, kryeministri aktual Gordon Brown "krenohej me shfrytëzimin mjeshtëror të materialeve të tilla".

Në faqet ndërkombëtare e përditshmja britanike, THE DAILY TELEGRAPH , shkruan se NATO pritet të vonojë ambiciet e Gjeorgjisë për t'u bërë pjesë e Aleancës Veriatlantike, gjë që sipas të përditshmes përbën edhe një fitore diplomatike për Rusinë.

Kur duket se edhe SHBA-ja do të mund të heqë dorë nga thirrja që Gjeorgjisë t'i jepet anëtarësimi në Plan-veprimin për anëtarësim në NATO, Kremlini pritet ta shohë samitin dyditore që zhvillohet në Bruksel si një veprim të përkrahjes së aksioneve ushtarake në Kaukaz në muajin gusht.

Edhe e përditshmja THE TIMES vëren se si marrëdhëniet më të ngrohta me Moskën i ftohin shpresat e NATO-s.

Ukraina është duke u përpjekur për të zbutur marrëdhëniet me Rusinë, në një kohë që NATO humb interesin për të ofruar një anëtarësim të shpejtë të këtij vendi në Aleancë.

Rivlerësimi vjen në kohën kur po zhvillohet një debat lidhur me qëndrimin për të patur marrëdhënie antagoniste me Kremlinin, në mënyrë të veçantë pas përplasjes së Rusisë dhe Gjeorgjisë këtë verë.

Sekretarja amerikane e Shtetit që merr pjesë në samitin dyditor të Brukselit, mbështeti angazhimet e e Uashingtonit për anëtarësim të plotë të Ukrainës dhe Gjeorgjisë, por shtoi se kishte "dallime taktike", lidhur me kohën se kur duhet të bëhej kjo.

Disa të përdithshme komentojnë përbërjen e adminstratës së ardhshme amerikane të presidentit të zgjedhur Barack Obama.

THE FINANCIAL TIMES shkruan se adminstrata e re po anon në anën "e falkojve", pra duke nën kuptuar se po anon në krahun më agresiv të partisë Demokratike.

Duke përshkruar ekipin e tij që përfshin ish zonjën e parë Hillary Clinton, sekretarin aktual të Mbrojtjes Robert Gates, zoti Obama tha se ekipi i tij përfaqësonte shembullin më të mirë të eksperiencës amerikane, duke shtuar se të gjithë ata ndanin të njëjtën filozofi.

Presidenti i ardhshëm tha se fushata e tij kishte qënë e mbështetur në pretendimin për eksperiencë, ndaj edhe ishte e nevojshme që të jepej provë që e mbështeste këtë.

THE GUARDIAN shkruan se përplasjet Obama-Clinton u bënë një çështjeje e së shkuarës, megjithëse kjo e shkuar nuk ishte shumë e largët, por vetëm pranverën e kaluar.

Emërimi i zonjës Clinton, për të cilën u përfol 3 javë më parë është përshëndetur masivisht, është cilësuar gjeniale, por edhe e këshilluar keq.

Por kur dy ish kundërshtarët dolën bashkë në konferencën për shtyp, "pasojat e jashtëzakonshme" filluan të zbehen.

Një mbështetëse dhe kundërshtar i luftës në Irak duhet të punojnë sëbashku për t'i dhënë fund luftës, shkruan e përditshmja.

Zonja Clinton dhe dy pjesëtarët e tjerë të krahut më agresiv, gjenerali në pension, James Jones dhe sekretari i Mbrojtjes Robert Gates e kanë mbështetur ndryshimin radikal të timonit të administratës, vëren THE GUARDIAN.