Recesioni - si të parandalohet

THE INDEPENDENT shkruan se stërlina bie në nivelin më të ulët rekord kundrejt euros. Fillimisht ranë çmimet e pronave, pastaj të aksioneve, tani stërlina po bie, shkruan gazeta.

Tani një euro mund të blihet me 84 pens, dhe gazeta paralajmëron se papritur është shfaqur mundësia e barazimit të një sëtrline me një euro.

Gazeta vë në dukje se arsye për këtë rënie është perspektiva e zymtë ekonomike për Britaninë që po shkon drejt recesionit.

Në prag të samitit të grupit të 20 vendeve më të zhvilluara dhe atyre në zhvillim, kushtuar krizës financiare globale, THE GUARDIAN ndërkaq i kushton një vëmendje të theksuar thirrjes së kryeministrit britanik, Gordon Braun, drejtuar fuqive industrialisht më të zhviluara për t'u marrë vesh lidhur me programin e lehtësirave urgjente, të harmonizuara, tatimore me qëllim të parandalimit të zhytjes së botës në një recesion më të thellë.

Kryeministri britanik me këtë rast propozon korrigjimin e dobësive të konstatuara në sistemin financiar botëror, arkëtimin e më shumë parave në Fondin Monetar Ndërkombëtar dhe rihapjen e përfundimin deri në vitin 2009 të negociatave për tregtinë botërore, të ndërprera kohë më parë.

Gazeta THE FINANCIAL TIMES boton në faqe të parë një foto të pesë financierëve më të fuqishëm amerikanë, përfshirë Xhorxh Sorosin, që dhanë dëshmi para kongresistëve amerikanë.

Ata fajësuan për krizën e tanishme financaire "vetë sistemin", megjithëse paralajmëruan se teprimi me rregulla, do të mbysë "cilësitë më inovative" të tregjeve financiare.

THE DAILY TELEGRAPH njofton për kompletimin e administratës së presidentit të ri amerikan, Barak Obama.

Sipas gazetës, zëvendëspresidenti Xho Bajdën ka ftuar ish- këshilltarin e zëvendëspresidentit Al Gor gjatë mandatit të Klintonit që të bëhet shef i kabinetit.

Ky emërim, si dhe caktimi i këshilltarit të presidentit Klinton, Ram Emanuel shef i kabinetit të zotit Obama,ka bërë që shumëkush të dyshojë se Barak Obama do të shkel zotimin e vet se me mandatin e tij në Uashington do të vijnë edhe ndryshimet.

Dhe së fundi - gati të gjitha të përditshmet britanike shënojnë sot gjashtëdhjetëvjetorin e lindjes së Princit Çarls.

"Nje gur kilometrazhi për një princ jeta e të cilit ka kaluar në pritje" - shkruan gazeta THE GUARDIAN.

Për shumicën e burrave, ditëlindja e gjashtëdhjetë është moment reflektimi, ngadalësim i aktivitetit dhe pritje e daljes në pension, por kjo nuk vlen për princin e Uellsit, - thekson gazeta. Gjithë jetën e tij, që nga mosha tre vjeçare ai është bërë gati për ditën kur do pasojë të ëmën... Mbretëresha, ndërkaq gëzon shëndet shumë të mirë, madje më të mirë sesa nëna e saj në të njëjtën moshë, - përfundon kjo e përditshme britanike.