Qeveria britanike shpalli një plan 37 miliardë paund

Ato shkruajnë edhe për ndikimin që hapat e koordinuara të disa qeverive perëndimore po japin në bursa.

THE GUARDIAN hapet me titullin " Dita kur tregjet morën frymë sërish".

Ajo komenton rritjen e vlerës së aksioneve në bursat e Londrës, Frankfurtit dhe Nju Jorkut.

Duke u ndalur në krizën që ka përfshirë sektorin bankar, gazeta shkruan se drejtuesit e bankave britanike, të cilët kanë marrë shpërblime të majme deri tani, janë viktimat e para të planit të qeverisë për të ndërhyrë me atë që praktikisht është shtetëzim i këtyre bankave.

Në një shkrim tjetër kjo gazetë ndalet edhe në planin e Bashkimit Evropian për një paketë dy trilionë eurosh.

"Ky bixhoz financiar, që është më i madhi që nga hedhja në qarkullim e euros, është skema më e guximshme financiare që është parë deri tani", shkruan kjo gazetë.

THE TIMES hapet me titullin " Tregjet shënojnë rritje ndërsa bota hidhet në veprim për të shpëtuar bankat".

Në faqen e saj të parë, nën titullin "Katër të rënët", kjo gazetë boton fotografitë e drejtuesve të bankave kryesore britanike që njoftuan dorëheqjen e tyre pasi kryeministri Gordon Brown dha hollësi se si do të përdoreshin 37 miliardë paund të taksapaguesve për të shtetëzuar tre nga bankat më të mëdha të vendit, Royal Bank of Scotland, HBOS dhe Lloyds TSB.

Gazeta shkruan se Departamenti i Thesarit në Britani tani kontrollon 45% të tregut të kredive për shtëpi.

Në një nga komentet e saj kjo gazetë shtron pyetjen nëse kapitalizmi ka dështuar.

Gazeta arrin në përfundimin e kapitalizmit vetëm sa po i merren këmbët, por ai mund të dalë edhe më i fortë nëse politikat e matura ekonomike shndërrohen nga një slogan politik në mbikqyrëse të sektorit privat.

Në një shkrim tjetër të saj kjo gazetë e komenton shpalljen e planit të qeverisë britanike si një bombë për bankat.

THE INDEPENDENT hapet me titullin "Bankieri që nuk kërkoi falje", duke u ndalur në njërin prej drejtuesve të bankave që u larguan nga posti.

Sipas kësaj gazete, Drejtori Ekzekutiv i Bankës Royal Bank of Scotland, Sir Fred Goodwin, vitin e kaluar pati të ardhura që kapën shifrën 4.1 milionë paund dhe do të ketë një pension 580 mijë paund në vit.

THE FINANCIAL TIMES komenton vendimin e Autoritetit të Shërbimit Financiar në Britani që bankat më të mëdha dhe institucionet financiare të hedhin hapa të menjëhershëm për të garantuar që shpërblimet që marrin bankierët të jenë të lidhura me fitimet dhe rreziqet afatgjata.

Në një shkrim tjetër kjo gazetë shkruan se realizmi që po vihet re në reagimin botëror ndaj kësaj krize, tregon se drita që duket në fund të tunelit, nuk është një iluzion.

"Brown-i merr në pronësi bankat" - është titulli i gazetës THE DAILY TELEGRAPH.

Gazeta shkruan se me këtë ndërhyrje kryeministri Gordon Brown kërkon të krijojë imazhin e një Çurçilli të ditëve tona.