E përditshmja The Independent, bashkë me foton e Sekretares Amerikane të Shtetit, Condoleezza Rice dhe kryeministrit polak, Donald Tusk gjatë nënshkrimit të marrëveshjes, sjell edhe paralajmërimin për fillimin e mundshëm të një "krize të re raketash me Rusinë", për shkak se baza antiraketore në territorin polak do të jetë vetëm rreth 150 kilometra nga kufiri me Rusinë.

Gazeta përcjell opinionin e një analisti perëndimor, sipas të cilit, fakti që baza do të menaxhohet nga ushtrakë amerikanë, të çon në përfundimin se Rusia do të matet mirë para se ta çojë në mendje ndonjë sulm kundër Polonisë.

The Daily Telegraph e hap këtë zhvillim me titullin "Moska akuzon Shtetet e Bashkuara për një garë të re armatimi". Rusia, shkruan gazeta, ka përsëritur paralajmërimin se kundërpërgjigjja do t'i kapërcejë kufijtë e diplomacisë. Nga ana e saj, Sekretarja Amerikane e Shtetit, Rice, ka garantuar mbështetjen e sigurisë territoriale të Polonisë dhe citohet të ketë thënë se "nuk bëhet fjalë për Luftë të Ftohtë. Është një kohë e vështirë, por vështirësitë nuk duhen ekzagjëruar".

Gazeta shkruan se, sipas marrëveshjes që pritet të miratohet me shumicë votash nga parlamenti polak, veç sistemit mbrojtës, deri nga fundi i vitit të ardhshëm, në Poloni pritet të instalohet një bateri raketash amerikane Patriot.

Në një shpjegim për vendosjen e raketave Patriot, gazeta The Financial Times shkruan se marrëveshja për bazën anti-raketore në Poloni e ka inatosur Moskën e cila, sipas një deklarate të ministrisë së jashtme ruse, "do të duhet të reagojë".

The Financial Times shkruan se dje në Varshavë është nënshkruar edhe një deklaratë, sipas së cilës, deri në vitin 2012 për mbështetjen e raketave Patriot në Poloni do të krijohet edhe një garnizon i posaçëm.

Në një rubrikë të posaçme për zhvillimet ndërkombëtare me titull "Përplasja me Rusinë", gazeta The Times shkruan për atë që e përshkruan si "ftohje të mëtejshme të marrëdhënieve të Rusisë me Perëndimin".

Duke dhënë një kontekst të zhvillimeve në Kaukaz, The Times vëren se nënshkrimi i marrëveshjes amerikano-polake për sistemin e mbrojtjes raketore u bë në të njëjtën ditë kur rajoni i shkëputur i Abkhazisë i kërkoi Rusisë që t'i njihte pavarësinë.

Megjithë klimën e ftohtë në marrëdhëniet e Kremlinit me Perëndimin, The Times shkruan për garancitë që i janë ofruar Rusisë nga administrata amerikane dhe udhëheqja e lartë polake se sistemi i mbrojtjes raketore nuk ka objektiv Rusinë.

The Times citon presidentin polak, Leh Kazinski, të ketë thënë se "ata që kanë qëllime të mira ndaj Perëndimit nuk kanë arsye të frikësohen".