Britania e Madhe deri tani ka fituar 16 medalje të arta dhe ndodhet në vendin e tretë në listën e medaljeve, pas Kinës dhe SHBA-ve. Ky është numri më i madh i medaljeve të fituara që nga viti 1908, kur Britania kishte fituar 56 medalje të arta, por rrethanat kanë qenë të tjera, sepse në shumë prej këtyre sporteve thuhet të ketë patur përfaqësues vetëm nga Britania e Madhe.

Por gazetet i kushtojnë rëndësi e analiza zhvillimeve në Kaukaz, si dhe humbjes së ushtarëve francezë në Afganistan.

Gazeta The Independent shkruan se takimi ministror në NATO, edhe në rrethanat e krijuara nga konflikti mes Rusisë dhe Gjeorgjisë, ka treguar ndarje mes atyre që kanë përkrahur vendin e vogël që dëshiron të jetë pjesë e NATO-s dhe atyre vendeve që nuk duan të provokojnë përplasje serioze me Rusinë.

Disa deklarata që kanë dalë nga selia e NATO-s janë shqetësuese, kur vihen re dallimet të cilat duhen sheshuar, shkruan gazeta.
The Independet shkruan edhe se dhuna e shfaqur para dy javësh nuk është argument i duhur për përfshirje të shpejtë të Gjeorgjisë në NATO, gjë që duket se po synohet në Bruksel. Gazeta shkruan se ajo që duhet të synohet është evitimi i nxitjes së atyre konflikteve të ngrira si një shkak për të zgjeruar përplasjet.

Gazeta The Times vlerëson se NATO, një herë nga Rusia e më pas edhe me vdekjen e ushtarëve francezë në Afganistan, ka pësuar dy humbje të cilat kanë ndodhur në momente jo të përshtatshme.

Këto dy konflikte duhen parë të veçuara, shkruan gazeta. Gazeta thotë se NATO me aksionet në Gjeorgji u gjet në befasi, por jo dhe i dobësuar. Aleanca ushtarake, mbase me vështirësi, përpiqet që të mbajë kontroll mbi talebanët në Afganistan, por siç ka treguar Lufta e Ftohtë, asgjë nuk mundet të nënshtrojë demokracitë perëndimore nga bashkimi efikas përballë një superfuqie bërthamore.

Gazeta The Guardian paralajmëron se nga takimi i NATO-s në Bruksel po dërgohen sinjale të gabuara.
Duke kujtuar se sa rusë jetojnë në shtetet e ish-Bashkimit Sovjetik, gazeta thotë se harta e Bashkimit Sovjetik mund të vizatohet shumë lehtë.

The Guardian shkruan se nuk është në interes të askujt që kjo të bëhet nëpërmjet tankeve ruse apo garancive për sigurinë që mund të jepen nga Perëndimi.

Mundësia e Aleancës që të zgjidhë konfliktet në Kaukaz është e kufizuar, por mundësia për t'i përhapur ato është e pakufizuar, shkruan The Guardian.

The Daily Telegraph vlerëson se përgjigja e vakët e Aleancës ndaj, siç shkruan gazeta, sjelljes prej të forti të Rusisë, nuk mund të jetë sinjal i mirë për ambiciet e Gjeorgjisë dhe Ukrainës për të qënë pjesë e NATO-s.