Botuar: E mërkurë, 23 korrik 2008 - 07:35 CET

Komente për Karaxhiçin

Gazetat britanike botojnë pa përjashtim fotografinë e Radovan Karaxhiçit me flokë të gjatë dhe mjekër të bardhë, krahas shkrimeve dhe komenteve për arrestimin e njërit prej personave më të kërkuar nga Gjykata e Hagës.

"Arrestimi i Karaxhiçit - Serbia betohet se tani radhën e ka komandati i tij ushtarak", shkruan e përditshmja THE GUARDIAN, duke iu referuar ish-komandantit ushtarak të serbëve të Bosnjës, Ratko Mlladiç.

Gazeta i referohet gjithashtu një deklarate të ministrit të jashtëm serb, Vuk Jeremiç, se qeveria e re serbe është e angazhuar që t'i çimentojë marrëdhëniet e saj me Bashkimin Evropian duke hedhur hapa për arrestimin e Ratko Mlladiçit.

The Guardian shkruan se arrestimi i Karaxhiçit ka hapur një epokë të re në marrëdhëniet e Serbisë me Perëndimin.

Gazeta i referohet gjithashtu njoftimit të Beogradit se do t'i rikthejë ambasadorët në vendet që njohën pavarësinë e Kosovës, të cilët ishin tërhequr nga qeveria e mëparshme serbe në shenjë proteste.

Sipas gazetës këto hapa e shtojnë edhe më shumë shansin e integrimit të plotë të Ballkanit në familjen evropiane pas afro 20 vjet nacionalizmi, dhune, lufte dhe izolimi.

Kjo gazetë shkruan se Karaxhiçi pritet të ekstradohet shumë shpejt në Hagë.

Ajo citon burime në Beograd të ketë thënë se ekstradimi mund të bëhet që të premten.

Në një koment të saj në faqet e brendshme, ku botohet edhe një fotografi e madhe e Radovan Karaxhiçit dhe Ratko Mlladiçit në kohën e luftës në Bosnje, gazeta The Guardian shkruan se arrestimi i Karaxhiçit është një lajm që të qetëson por nuk ka vend për eufori.

"Ndërsa Evropa feston arrestimin e Karaxhiçit, vazhdon ndjekja për Mlladiçin", shkruan gazeta THE INDEPENDENT.

Gazeta iu referohet spekulimeve tre vjet më parë se Ratko Mlladiç kishte ofruar që të dorëzohej me kusht që familjes së tij t'i jepej një shumë me një vlerë 2.75 milionë stërlina.

Kjo gazetë boton edhe reagimet në Bosnjë pas njoftimit për arrestimin e Radovan Karaxhiçit.

"Qava nga gëzimi. Sot për herë të parë e ndjeva se lufta ka përfunduar", citon kjo gazetë një boshnjake që u plagos rëndë gjatë bombardimit të Sarajevës.

Në faqen e saj editoriale kjo gazetë e quan arrestimin e Karaxhiçit 'triumf për Evropën'.

"Joshja drejt anëtarësimit në Bashkimin Evropian bën që vendet aspirante të kryejnë ndryshime sociale, ligjore por edhe politike", shkruhet në artikullin editorial të kësaj gazete.

Shkrimi shoqërohet edhe me një karikaturë ku Karaxhiçi, që me identitetin e rremë Dragan Dabiç, praktikonte mjekësinë alternative, ka ngritur një hanxhar dhe pritet të godasë një klient të shtrirë në shtrat, ndërsa pas duket një grumbull kafkash.

Arrestimit të Karaxhiçit kjo gazetë i kushton edhe disa faqe nga shtojca e saj.

"Karaxhiçi përballet me drejtësi", shkruan THE TIMES në faqen e saj editoriale.

Gazeta citon deklaratën e ish-të dërguarit amerikan në Ballkan, Richard Holbrooke, se më më fund ishte kapur Osama Bin Ladeni i Evropës.

Në një artikull në faqet e saj të brendshme kjo gazetë shkruan se dhe në burg monstra e krijuar nga Millosheviçi mund të kthehet në një lloj fituesi, pasi marrëveshja e Dejtonit, ndër të tjera, sanksionoi republikën serbe të Bosnjës si një entitet më vete.

Shumë policë apo ushtarë të serbëve të Bosnjës jetojnë e punojnë lirisht në qytetet e fshatrat ku dikur kanë kryer krime", shkruan kjo gazetë.

THE DAILY TELEGRAPH boton një listë të personave që ende kërkohen nga Gjykata e Hagës por edhe të atyre që janë gjykuar apo po gjykohen në Hagë.

Ajo boton gjithashtu akuzat e ngritura nga kjo gjykatë për Karaxhiçin.

Ndërsa THE FINANCIAL TIMES shkruan se në operacionin për identifikimin dhe kapjen e Karaxhiçit ndihmuan edhe shërbimet amerikane dhe britanike të zbulimit.

Gazeta shkruan se shërbimi serb i zbulimit mori informacion nga një agjensi e huaj disa javë përpara se të kryehej operacioni, por ai u krye vetëm kur presidenti Tadiç vendosi njeriun e tij të besuar në krye të këtij shërbimi.

Burime të shërbimeve të huaja i thanë kësaj gazete se ajo që kishte ndodhur këtë herë ishte se Karaxhiçi nuk kishte më mbrojtje politike në Beograd.