Avulli del nga reaktori bërthamor në Fukushima

Megjithatë, zyrtarët thanë se duhen teste të tjera përpara se të hapet energjia elektrike.

Për momentin, uji deti po përdoret për të ftohur reaktorin numër 3.

Më herët puna u pezullua për të dytën herë brenda 24 orësh pasi nga reaktorë u pa të dilte avull dhe tym.

Niveli i radioaktivitetit u rrit për pak kohë dhe inxhinjerët u urdhëruan të largoheshin nga uzina.

Puna për të rivendosur rrymën në reaktorë filloi pak përpara agimit.

Në mbrëmje për herë të parë, kabllot e energjisë u lidhën në të gjashtë reaktorët.

Agjencia Ndërkombëtare për Energjinë Atomike thotë se situata mbetet ende shumë serioze.

Deri tani numri i viktimave ka shkuar në mbi nëntëmijë vetë.

MBi 12000 njerëz janë ende të zhdukur pas tërmetit prej 9 ballësh dhe cunamit që goditi pjesën verilindore të Japonisë.

Ndërkaq qeveria do të njoftojë masa të reja për të parandaluar që produktet ushqimore me radioaktivitet të dalin në treg.

Fshatarëve që jetojnë pranë uzinës bërthamore u është thënë të mos pijnë ujë nga çezma, për shkak të nivelit të lartë të jodit radioaktiv.

Gjatë fundjavës u zbulua se qumështi dhe spinaqi i prodhuar pranë uzinës Fukushima përmbante nivele radioaktiviteti, megjithëse nuk ishte në nivelet e dëmshme për jetën.

Qeveritë lokale u kanë kërkuar prodhuesve të qumështit dhe spinaqit që të mos i nxjerrin në shitje produktet e tyre.

OBSH ka thënë se nuk ka prova që produkte të ndotura të kenë mbërritur në vende të tjera.

Megjithatë Kina dhe Koreja e Jugut kanë thënë se do t'i forcojnë kontrollet mbi produktet japoneze.