David Cameron tha se Gaddafi kishte shkelur armëpushimin

Gazetarëve iu tregua ndërtesa e shkatërruar, por nuk është e qartë nëse ka patur viktima.

Disa vende, ku përfshihen SHBA-ja, Britania e Madhe dhe Franca vazhdojnë sulmet ajrore, pasi OKB-ja autorizoi veprimet ushtarake për të mbrojtur civilët nga forcat qeveritare.

Kolonel Gaddafi po lufton një rebelim që filloi muajin e kaluar.

Zyrtarët amerikanë kanë thënë se vetë Kolonel Gaddafi nuk është objektiv i sulmeve.

Ata thonë se sulmet kanë në shënjestër forcat e armatosura dhe sistemet e mbrojtjes.

Një zyrtar libian tha se 64 ishin vrarë gjatë sulmeve në fundjavë, por kjo shifër nuk mund të verifikohet.

Fuqitë në veprim

Udhëheqësit e vendeve të angazhuara për zbatimin e zonës së ndalim-fluturimit mbi Libi, ishin mbledhur në Paris, kur avionët francezë ndërmerrnin veprime ushtarake.

Presidenti francez Nikolas Sarkozy tha se avionët francezë po mbronin qytetarët në Bengazi nga sulmet e forcave të Kolonelit Gaddafi.

Ai tha se Franca kishte për detyrë të ndihmonte popujt arab, të cilët kërkojnë të drejtën për të vendosur për të ardhmen e tyre.

Zoti Sarkozy tha se Franca ishte duke vepruar bashkë me shtetet e tjera arabe për të përballuar atë, që ai e quajti "çmendurinë vrastare të regjimit Gaddafi".

Ndërkohë kryeministri britanik David Cameron, ka akuzuar liderin libian se ka shkelur fjalën e vetë për armëpushimin në Libi.

Duke folur në Paris, zoti Cameron tha se kishte ardhur koha që komuniteti ndërkombëtar të ndërmerrte veprime urgjente.