Avulli del nga reaktori bërthamor në Fukushima

Megjithëkëtë sistemet e ftohjes nuk operojnë ende.

Agjencia Ndërkombëtare për Energjinë Atomike thotë se situata mbetet ende shumë serioze.

Disa punëtorë në këtë infrastrukturë të dëmtuar janë evakuuar përkohësisht, pasi nga reaktori numër 3 u pa të dilte tym.

Deri tani numri i viktimave ka shkuar në 8450.

Gati 13000 janë ende të zhdukur pas tërmetit prej 9 ballësh dhe cunamit që goditi pjesën verilindore të Japonisë.

Ndërkaq qeveria do të njoftojë masa të reja për të parandaluar që produktet ushqimore me radioaktivitet të dalin në treg.

Fshatarëve që jetojnë pranë uzinës bërthamore u është thënë të mos pijnë ujë nga çezma, për shkak të nivelit të lartë të jodit radioaktiv.

Gjatë fundjavës u zbulua se qumështi dhe spinaqi i prodhuar pranë uzinës Fukushima përmbante nivele radioaktiviteti, megjithëse nuk ishte në nivelet e dëmshme për jetën.

Qeveritë lokale u kanë kërkuar prodhuesve të qumështit dhe spinaqit që të mos i nxjerrin në shitje produktet e tyre.

OBSH ka thënë se nuk ka prova që produkte të ndotura të kenë mbërritur në vende të tjera.

Megjithatë Kina dhe Koreja e Jugut kanë thënë se do t'i forcojnë kontrollet mbi produktet japoneze.