Avulli del nga reaktori bërthamor në Fukushima

Helikopterët dhe pompat kanë hedhur ujë deti mbi reaktorët për të penguar shkrirjen e shufrave të karburantit bërthamor ndërsa inxhinierët po përpiqen të kthejnë energjinë tek pompat ftohëse.

Agjencia Ndërkombëtare e Energjisë Bërthamore thotë se gjendja mbetet serioze, por se nuk është përkeqësuar në mënyrë të konsiderueshme.

Ndërkohë njoftohet se numri i konfirmuar i viktimave të tërmetit të javës së shkuar, që shkaktoi cunamin, ka shkuar në 5 400 vetë. Policia thotë se 9 500 të tjerë janë të humbur.

Një zyrtar i agjencisë bërthamore, Graham Andrew, u tha gazetarëve në Vjenë se gjendja në Fukushima nuk është përkeqësuar, por ende ka rrezik që kjo të ndodhë.

"Mund të themi që, krahasuar me dje, gjendja është e qëndrueshme brenda arsyes," tha ai.

Zoti Andrew tha se reaktori 4, që nuk ishte në veprim, por që përdorej për të mbajtur shufrat e përdorura të karburantit bërthtamor, ishte ende "një shqetësim i konsiderueshëm për sigurinë" dhe se niveli i ujit po binte gjithashtu në rezervuarët e ftohjes të reaktorëve 5 dhe 6.

Por ai tha se nuk ka pasur rritje të rezatimit në Tokjo dhe se nivelet mbeteshin shumë nën nivelin e rrezikshëm për shëndetin e njeriut.