EULEX

Zoti Limaj i është përgjigjur Misionit Evropian në orët e vona të mbrëmjes i shoqëruar nga avokati i tij, Tomë Gashi, dhe pas marrjes në pyetje është lënë i lirë, për t'u paraqitur sërish në Gjykatë.

Deputeti Limaj, një nga ish-komandantët e UÇK-së, i njohur me nofkën e luftës "Komandant Çeliku", tha se e kaluara e tij ishte e shumë e pastër dhe se ai nuk kishte për çfarë të pendohej.

Zoti Limaj ishte akuzuar edhe nga Gjykata Ndërkombëtare për Krime Lufte në Hagë, por pas përfundimit të procesit gjyqësor, në nëntor të vitit 2005, ishte shpallur i pafajshëm nga të gjitha pikat e aktakuzës.

Dyshime të reja

Tani EULEX-i po heton dyshimet për përfshirjen e mundshme të tij në “torturimin çnjerëzor të civilëve serbë e shqiptarë të paraburgosur gjatë kohës së konfliktit në një kamp të UÇK-së në komunën e Lipjanit”.

Zoti Limaj ishte në mesin e nëntë ish-pjesëtarëve të UÇK-së ndaj të cilëve EULEX-i lëshoi të martën fletëarreste.

Zëdhënësi i EULEX-it, Nikolas Hawton, ka thënë se arrestimi i nëntë personave dhe bastisjet në disa vende janë bërë në kuadër të hetimeve për krime të luftës.

"Arrestimet janë kryer me urdhër të gjykatësit të EULEX-it të procedurës paraprake nga Gjykata e Qarkut të Prishtinës, bazuar në dyshimet e bazuara për vrasje, torturime dhe vepra të tjera penale të bëra kundër civilëve shqiptarë dhe serbë të Kosovës, si dhe ndaj të burgosurve të luftës në qendra të paraburgimit në Kosovë në vitin 1999," tha zoti Hawton.

"Hetimet janë duke u kryer nën mbikëqyrjen e një prokurori të EULEX-it nga Prokuroria Speciale e Kosovës,” tha ai.

Për të njejtat akuza, një person tjetër është arrestuar edhe në Zvicër.

Disa prej të akuzuarve u është shqiptuar masa e paraburgimit prej 30 ditësh, ndërsa disa të tjerëve masa e arrestit shtëpiak.

Kundër arrestimeve në komunën e Lipjanit dhe Malishevës kanë reaguar shoqatat e dala nga lufta.

Në reagim e tyre thuhet se “veprimet e EULEX-it janë të pabazuara e të papërgjegjshme, me qëllim të njollosjes së luftës çlirimtare dhe për të provokuar një situatë të tensionuar në Kosovë”.

“Duke qenë dëshmitarë të veprimit të grupeve kriminale serbe edhe më tutje brenda territorit të Kosovës, një pjesë e të cilave struktura janë edhe përgjegjëse për gjenocidin e bërë gjatë luftës, ne kërkojmë që gjahu kundër luftëtarëve të UÇK-së të ndërpritet menjëherë, e të ndiqen kriminelët e vërtetë”, thuhet në reagimin e shoqatave të dala nga lufta.

Deri me tani nuk ka pasur ndonjë reagim nga Qeveria apo presidenti i Kosovës.