Ky zhvillim vjen një ditë pasi Bahreini përjetoi dhunën më të rëndë që kur 7 protestues anti-qeveritarë humbën jetën gjatë përplasjeve me forcat e sigurisë muajin e kaluar.

Dhjetëra njerëz u plagosën ditën e djelë kur protestuesit zbrapsën policët dhe ngritën barrikada në rrugë.

Opozita në Bahrein tha se trupat e huaja në vend përbënin një pushtim.

Një zyrtar saudit tha se rreth 1000 trupa nga Arabia Saudite mbërritën në Bahrein ditën e hënë.

Trupat janë pjesë e Këshillit për Bashkëpunimin në Gji, një grup rajonal prej gjashtë vendesh që përfshin Bahreinin, Arabinë Saudite, Kuvajtin, Omanin, Katarin dhe Emiratetet e Bashkuara Arabe.

Besohet se trupat do të kenë si qëllim të mbrojnë objekte kyçe si rafineritë e naftës dhe gazit dhe institucionet financiare.