Forcat e Gaddafit godasin rebelët me artileri e avionë

Dhjetra luftëtarë rebelë janë larguar nga ky rajon në mesin e bombardimeve të fuqishme.

"Brega është spastruar nga bandat e armatosura," i tha televizionit shtetëror libian një burim ushtarak.

Ka disa ditë që forcat rebele libiane po humbin terren, përfshirë portin naftësjellës Ras Lanug ditën e shtunë.

Forcat rebele u larguan nga Brega në makina të pajisura me armë kundër-ajtore dhe u tërhoqën në drejtim të Ajdabiyas, që është pika kyçe në drejtim të qyteteve të Bengazit dhe Tobrukut, që mbahen nga rebelët.

Ata thonë se forcat e kolonel Gaddafit kanë kryer sulme ajrore dhe goditje me artileri në Brega.

Tani forcat e kolonel Gaddafit ndodhen rreth 60 km larg Ajdabiyas.

Në qytetin e Bengazit motivimi për të luftuar është i lartë, thotë korrespondenti i BBC-së, ndërsa luftëtarë të plagosur kthehen dhe të tjerë drejtohen për në vijat e frontit.

Ndërkohë, njoftimet nga baza e fundit rebele në Libinë perëndimore, Misrata, thonë se trupat e kolonel Gaddafit janë në rrethinat e qytetit ku dëgjohet zjarri i tankeve.

Presioni ndërkombëtar diplomatik po shtohet për vendosjen e një zone të ndalimit të fluturimit mbi Libinë.

Të shtunën, Lidhja Arabe ra dakord që t'i kërkojë Këshillit të Sigurimit të OKB-së për vendosjen e një zone të tillë.

Britania dhe Franca kanë kërkuar marrjen e një hapi të tillë, por deri tani nuk kanë mundur të sigurojnë mbështetjen e BE-së dhe NATO-s.

Rusia dhe Kina, që kanë të drejtën e vetos në Këshillin e Sigurimit të OKB-së, ka në shprehur rezerva serioze ndaj këtij hapi.