Gadafi thotë se perëndimi do naftën e Libisë

Në një intervistë dhënë një kanali televiziv turk, ai tha se një zonë e tillë do të tregonte se synimi i vërtetë ishte të merrej nafta e Libisë.

Ndërkaq, forcat pro-Gadafit kanë goditur periferinë e qytetit Zawiya dhe janë përpjekur të marrin nën kontroll qendrën e qytetit.

SHBA ka thënë se çdo vendim i mundshëm për një zonë të ndalim-fluturimit, është në duart e OKB-së.

Mbi 1 mijë persona besohet se kanë vdekur që nga fillimi i kryengritjes kundër regjimit 41 vjeçar të Kolonel gadaffit në Libi tri javë më parë.

Rreth 212 mijë vetë, shumica e tyre punëtorë migrantë, janë larguar nga vendi, sipas përllogaritjeve të OKB-së.

Shtohen thirrjet

Sekretari i Përgjithshëm i Organizatës së Konferencës Islamike, Ekemeleddin Ihsanoglu, tha të martën se ai përkrah vendosjen e një zone ndalim-fluturimi mbi Libinë, por u shpreh kundër ndërhyrjes ushtarake direkte.
Zoti Ihsanoglu u shpreh kështu në Arabinë Saudite në fillim të një takimi urgjent të vendeve anëtare.

Organizata ka pesëdhjetë e shtatë shtete anëtare.

Shtete e Gjirit Arabik i kanë bërë thirrje Këshillit të Sigurimit të OKB-së të mbrojë populsinë civile në Libi.

Britania dhe Franca ndërkohë kanë vazhduar punën për një projekt rezolutë të OKB-së mbi një zonë ndalim-fluturimi.

Në Libi ndërkohë, forcat e opozitës rreth qytetit të naftës të Ras Lanufit janë sulmuar përsëri nga forcat ajrore të Kolonel Gaddafit. Dëshmitarët flasin për shtëllunga tymi, por nuk ka njoftime për viktima.

Ndërsa rafineritë libiane po mbyllen, pjesa lindore e vendit thuhet se së shpejti nuk do të ketë karburant