BBCAlbanian.com
 
Botuar: E mërkurë, 09 shkurt 2011 - 13:25 CET
 
Dërgoja një miku   Version i printueshëm
Taksa speciale mbi bankat
 
Royal Bank of Scotland
Shtypi britanik ka sot në fokus taksat speciale mbi bankat, të cilat i detyrojnë ato të paguajnë 1.3 miliarda sterlina më shumë se sa prisnin këtë vit.

Ministri përgjegjës për Financat, kancelari George Osborne, tha se rritja është bërë për shkak se pozita financiare e bankave është përmirësuar.

Por e përditshmja The Financial Times thotë se masa e ndërmarrë nga qeveria nuk është asgjë më shumë se një ndërhyrje e vogël kozmetike.

Por udhëheqësit laburistë thonë se megjithë kësaj rritjeje bankat do të paguajnë më pak taksa sesa vitin e kaluar

Një e përditshme tjetër The Times thotë se ministrat konservator mund të kenë dëshirë t'u rrisin taksat bankave por në fakt janë bankat ato që i mbajnë ata të gjallë, duke sugjeruar se në bazë të një studimi 50 përqind e donacioneve për partinë konservatore në pushtet kanë ardhur nga sektori financiar.

Dy të përditshme të tjera, The Guardian dhe The Independent botojnë këto shifra të këtij studimi duke thënë se sektori financiar financon konservatorët.

Në këtë kohë kur shkurtimet në sektorin publik po godasin një numër të punëtorëve e përditshmja The Daily Mail pyet se si është e mundur që partia në pushtet në Britani mvaret kaq shumë nga donacionet e një sektori që ka vuajtur më së pakti në kuadër të shkurtimeve.

Pensionistja britanike, Ann Timson, e cila ka sulmuar me çantën e vet një bandë hajdutësh ndërsa po vidhnin nga një dyqan ari është shndërruar në heroinë dhe ndodhet në faqet e para të shumë gazetave të sotme.

Një kamerë e survejimit ka arritur të regjistroi të gjithë ngjarjen ku ajo me guxim të jashtëzakonshëm parandalon këtë vjedhje dhe tani ka fituar titullin supergjyshja.

Disa gazeta kanë mesazhin e ngjashëm se rrugët e Britanisë do të ishin më të sigurta nëqoftëse qytetarët do të ndiqnin shembullin e supergjyshes Ann.

E përditshmja The Daily Mirror thotë se supergjyshja me çantën e vet ka bërë më shumë shoqërinë britanike se sa e gjithë qeveria.

Në shumë faqe të para sot gjithashtu ndodhet një grua tjetër e fuqishme Margaret Thatcher, apo më saktësisht aktorja Meryl Streep e cila i ngjanë shumë asaj në një film të ri biografik për 'zonjën e hekurt'.

Filmi do të shfaqet më vonë këtë vit, kështu që Meryl Streep është vonuar për çmimet oskar të këtij viti por me gjasë do të jetë në mesin e aktorëve të nominuar për rolin më të mirë në vitin e ardhshëm.

The Daily Mail thotë se shikimi i hekurt i zonjës Streep të kujton shumë atë të vetë zonjës Thatcher.

 
 
GJITHASHTU
 
 
Dërgoja një miku   Version i printueshëm
 
 
 
BBC ©
 
^^ Kthehu në krye
 
  Arkiv
 
  BBC News >> | BBC Sport >> | BBC Weather >> | BBC World Service >> | BBC Languages >>