The Guardian thotë se ka pasur një përpjekje e bashkërënduar e regjimit të Hosni Mubarakut për të marre kontrollin e rrugëve,si dhe për të shtypur kryengritjen popullore dhe për të rikthyer autoritetin e saj në mbarë vendin.

Gazeta sjell në faqen e parë me foto të protesusve të lënduar nën kryetitullin "Beteja për Egjiptin".

Gazeta thotë se kishte skena të jashtëzakonshme në qendër të Kairos ndërsa demonstruesit anti-qeveritare po zhvillonin beteja me grupe të organizuar të përkrahësve të Mubarakut duke shkëmbyer grushtat mes veti apo duke hedhur gurë nga distanca.

Një analiste e zhvillimeve të atjeshme Ahdaf Soueif tha se regjimi Mubarakut ka lëshuar kriminelet e vetë në rrugë për të frikësuar protestuesit në të njejtën mënyrë sikurse e kishte bërë gjatë zgjedhjeve të kaluara.

Për Robert Fisk-un në të përditshmen The Independent kjo ishte më së afërmi luftës civile që mund të kishte qenë ndonjëherë më pare Egjipti.

Gazetari i The Independent ka një titull të gjatë ku thotë se qielli ishte përplot me gurë dhe se luftimet përreth tij ishin aq të tmerrshme sa ai mund të ndjente kundërmimin e gjakut.

The Independent në njerën prej disa faqeve që i ka kushtuar situatës në Egjipt merret edhe me aspektin ndërkombëtar.

Ajo thotë se protestat i kanë vendosur Shtetet e Bashkuara në një pozitë shumë të vështirë.

Gazeta thotë se ndonëse Uashingtoni është shprehur se dënon dhunën skandaloze në Egjipt ai duket i pafuqishëm që të ndërhyjë në gjithë këtë situatë.

Këto fjalë vetëm që theksojnë pafuqinë e administratës së Obamës e cila në këtë moment sikurse gjithë të tjerët është reduktuar në një shikues të thjeshtë të televizonit për të kuptuar ngjarjet më të fundit.

The Financial Times përshkruan Kairon si një qytet në luftë.

Sheshi Tahrir është një fushë betejë mes mbështetësve të presidentit Mubarak dhe protestuesve, vazhdon FT.

Dhe vendimi i qartë për të përdorur dhunën kundër demonstruesve sugjeron se regjimi ka arritur në fund të koncesioneve politike dhe se ai është i përgatitur për të bërë gjithëçka për të mbajtur pushtetin, shton gazeta.

The Daily Telegraph thotë se ushtria ndodhet në një pozicion të vështirë duke u përpjekur që të rivendos rendin dhe ligjin pa u dukur sikur po merr anën e ndonjëres palë.