Protestat po përhapen në botën arabe

"Egjipti po përgatitet për protesta të tjera masive pasi pothuaj 900 persona u arrestuan në demonstratat më të mëdha anti-qeveritare të vendin në kohën moderne," shkruan gazeta e cila shton: "udhëheqësit në shtete fqinjë ndoqën me nervozizëm përhapjen e protestave".

Britania dhe Shtetet e Bashkuara, shkruan gazeta, bënë thirrje për përmbajtje, por u dukën se u rreshtuan në rradhën e protestuesve dhe jo të qeverisë autoritare".

Nën okelion "Protestat përhapen në botën arabe", e përditshmja Financial Times po në faqen e parë shkruan se egjiptianët protestues nuk kërkonin vetëm fundin e sundimit 30 vjeçar të Hosni Mubarak-ut, por dhe të rrëzimit të personit që mendohet se është planifikuar që ta pasojë atë në post, i biri, Gamal.

Me përhapjen e protestave në botën arabe, të nxitura nga revolta tuniziane, regjimet dinastike të vendeve të rajonit me gjasë, do të jetë viktima kryesore e tyre, shkruan FT.

Guardian shkruan se si në Tunizi, kundërshtarët e Mubarakut kanë përdorur rrjete tsociale në internet për organizimin e protestave, edhe pse si thotë gazeta, Facebook-u dhe faqja Twitter janë ndaluar nga autoritetet.

Në zhvillime të tjera, Times shkruan për zhvillimet në Itali, pasi prokurorët në Milano, sipas saj, kanë kërkuar autorizim për të bastisur zyrtat e kryellogaritarit personal të kryeministrit Berlusconi si pjesë e hetimeve rreth akuzave se kryeministri ka paguar për të kryer marrëdhënie seksuale me një prostitutë në moshë të njomë dhe për abuzim të postit.

Gazeta nënvizon se sipas ligjit Italian, nëse gjendesh fajtor për akuzën e parë, dënimi shkon deri në 3 vjet burg.

Times njofton po ashtu se Nelson Mandela, presidenti i parë me ngjyrë i Afrikës së Jugut dhe burrë shteti i respektuar në mbarë botën, është shtruar të mërkurën në spital.

Gazeta shton se gjendja e tij shëndetësore ka ngjallur shqetësim dhe ka bërë që të mblidhen pjesëtarët e familjes. Punonjës të spitalit ndërkohë, kanë refuzuar të komentojnë për gjendjen shëndetësore të z. Mandela.

Gazetat shkruajnë dhe për njoftimin e BBC-së për mbylljen e shërbimeve në pesë gjuhë- mes tyre dhe gjuhët ballkanike, shqip, serbisht e maqedonisht.

Guardian shkruan se qeveria britanike është akuzuar se ka dëmtuar reputacionin e Britanisë në botë pas njoftimeve të Shërbimit Botëror të BBC-së me shkurtimet në buxhet, ajo do të humbasë 30 milion dëgjues.

Po në këtë temë, e përditshmja Independent boton një artikull me titull: "drojë se Mbretëria e Bashkuar do të humbasë ndikim pas shkurtimeve drastike në Shërbimin Botëror".

Gazeta njofton për protestat që u zhvilluan jashtë ndërtesës së Shërbimit Botëror të BBC-së në Londër si reagim i njoftimit për mbylljen e shërbimeve në pesë gjuhët e sipërpërmendura dhe të humbjes së 650 vendeve të punës nga gjithsej 2400 të punësuar në Shërbimin Botëror në Londër.