Filmi ka në qendër mbretin Xhorxh VI të cilit i merrej goja

Ai është propozuar për çmime në 12 kategori, përfshirë edhe atë për filmin më të mirë dhe aktorin më të mirë, Colin Firth.

Firth është propozuar për çmim për rolin e tij si Mbreti Xhorxh VI, të cilit i merrej goja, ndërsa aktorja Helena Bonham Carter dhe aktori Geoffrey Rush janë propozuar për çmime për aktorët më të mirë dytësor.

Filmi me kauboj, True Grit, që ka në qendër historinë e një vajze që vihet në gjurmët e vrasësve të babait të saj, është propozuar për 10 çmime.

Ndërsa Social Network, që dominoi Globet e Arta është kandidat për tetë çmime Oscar.

Çeremonia e ndarjes së çmimeve të kinematografisë amerikane zhvillohet në Los Anxhelos më 27 shkurt.

Filmi britanik, The King's Speech ka përballë konkurentë të fortë si The Social Network (Rrjeti Social), True Grit, Black Swan (Mjellma e Zezë), The Fighter, (Boksjeri), The Kids Are All Right (Fëmijët janë mirë) etj.

Në kategorinë për aktorin më të mirë, Colin Firth ka përballë Jesse Eisenberg, që luan në rolin e themeluesit të Facebook-ut, Mark Zuckenberg, James Franco nga filmi 127 Hours (127 orë), Javier Barden, për filmin Biutiful dhe Jeff Bridges për filmin True Grit.

Fituesja e Globit të Artë si aktorja më e mirë në filmin Mjellma e Zezë, Natalie Portman, kandidon përballë aktoreve Annette Bening, Nicole Kidman, Jennifer Lawrence dhe Michelle Williams.

Kandidaturat për çmimet Oscar u bën publike nga aktorja Mo'Nique dhe presidenti i Academisë së çmimeve Tom Sherak.