Sipas të dhënave zyrtare, nëse në fillim të viteve 90 në vend rregjistroheshin 240 mijë pensionistë, sot numri i tyre është rreth 500 mijë.

Jetëgjatësia mesatare ka shënuar gjithashtu një rritje. Për meshkujt ajo konsiderohet 75 vjet kurse për femrat 78 vjet.

Ndryshe nga vendet perëndimore, në Shqipëri ende ruhen të forta lidhjet familjare dhe një pjesë e të moshuarve jetojnë bashkë me fëmijët ose mbështeten financiarisht nga fëmijët.

Përndryshe me pensionet, me një mesatare 90 euro në muaj, nuk do të kishte qenë e mundur të jetonin mijëra e mijëra të moshuar.

Duke folur me korrespondentin e BBC në Tiranë, Aleksandër Furxhi, znj. Denada Seferi, drejtoreshë e politikave të shërbimeve sociale në ministrinë e punës dhe çështjeve sociale dhe znj. Lida Leskaj, drejtoreshë e qendrës komunitare ditore të Tiranës thanë midis të tjerash se edhe në Shqipëri ka nisur ndryshimi i tendencës me rritjen e shpejtë të numrit të moshuarve që jetojnë të ndarë nga fëmijët dhe me rritjen e numrit të atyre që thuajse braktisen nga familjet.

Dëgjoni bisedën në audio

Për të zbutur këtë dukuri shoqëria dhe shteti ndërhyjnë me ngritjen dhe mbajtjen e qendrave për të moshuarit, ato që në gjuhën e përditshme quhen azile të pleqve.