"Qeveria e unitetit të Tunizisë bie, ndërsa turmat përhapin kaos", shkruan The Daily Telegraph. Gazeta citon një gazetë franceze që njofton se besnikët e Ben Ali kanë fshehur qindra bomba për makina.

The Guardian shkruan " Qeveria e përkohshme tuniziane në rrezik të shpërbërjes, ndërsa katër ministra largohen. "

Po kjo gazetë citon edhe zotin El Baradei nga Egjipti që bën thirrje për reforma, por refuzon të përkrahë protestat.

The Times shkruan po për këtë zhvillim "Revolta tuniziane i vë zjarrin kutisë eshkë, ndërsa protestat vetëvrasëse përfshijnë botën arabe."

Dy egjiptiane të tjerë u përpoqën t'i vënë flakën vetes, ndërsa protestat tuniziane përhapen në botën arabe. Fjala është për një avokat dhe një llogaritar në pension që me bidonë vajguri u përpoqën t'i vinin flakën vetes.

Në Algjeri ku ka patur protesta për çmime të ushqimeve si ato që çuan në rrëzim të presidentit tunizian, pesë vetë i kanë vënë zjarrin vetes. Në Mauritani një burrë nga një familje e pasur gjithashtu i vuri flakën vetes të hënën.

Po në The Times, "Qeveria e Unitetit në krizë, ndërsa ministrat largohen si rezultat i lidhjeve me regjimin e vjetër."

The Indipendent thotë "Qeveria tuniziane në krizë vetëm pas një dite." Keu i ushtrisë tuniziane ushtron kontroll ndaj trupave të tij, ndërsa sheh dhe pret."

Gazeta shkruan "Udhëheqësi i opozitës arrestohen në Sudan pas thirrjes për kryengritje."

Ai u arrestua pasi tha se vendi duhet të ndiqte stilin tunizian të protestave për të rrëzuar regjimin e presidentit Omar al Bashir.

Në zhvillme të tjera të mbuluara në shtyp " Popullariteti i Obamës rritet ndërsa vrasjet në Tucson kthejnë valën kundër Palin. "

Dy sondazhe të veçanta gjetën se një shumicë e madhe, 78% aprovuan reagimin e presidentit pas atentatit ndaj kongresistes Giffords.

Por ishte midis të pavarurve që ka patur rritje të madhe përkrahjeje
për Obamën. Sondazhi gjithashtu tregon se Sarah Palin po paguan për refuzimin që ka bërë për ulje të tonit dhe retorikës pas ngjarjeve në Arizona.

Kirurgu turk flet për The Times

Jusuf Ercin Sonmez që është cilësuar si Dr Frankestein nga media turke ka mohuar se ka kryer transplante në një klinikë në Kosovë që është në qensër të një hetimi me pretendimet se ka lidhje me qeverinë e vendit. Dr Sonmez u akuzua nga prokurorë të BE-së se ka qenë figura kryesore pas një tregtie të paligjshme ku donatorë të varfër ishin mashtruar që të jepnin veshkat që u jepenin pacientëve që paguanin deri në 85 mijë stërlina.

Duke folur pas lirimit me kusht, ai tha se kishte kryer më shumë se 2400 transplante në 15 vjet. I pyetur nëse kishte patur ndonjëherë dyshime rreth burimit të organeve , ai tha "Nëse pyes se si e bëjnë këtë gjë, unë do të përfshihesha Kështu që pse të pyesja. Më duhen vetëm letrat zyrtare dhe kaq. "

Ai tha se Ilir Rrecaj, në atë kohë sekretar i përhershëm në Ministrinë e shëndetësisë në Kosovë e autorizoi atë të punonte në vend në 2008. Zoti Rrecaj është gjithashtu nën akuzë. Ai akuzohet nga prokurorët se i ka dhënë licence të rreme Klinikës Medicus.

Dr Sonmez tha se kontakti i parë i tij me Medicus ishte kur u ftua të fillonte punë atje në 2007. Ai tha se punoi atje për dhjetë muaj, por vetëm si këshiltar dhe kirurg i përgjithshëm. Ai tha se gjatë qëndrimit atje vetëm një transplant veshkash u krye.

Donatori ishte Yilmaz Altun 23 vjeç, një turk, i tha policisë së OKB se atij i ishte vjedhur veshka. Ai tha se kirurgu që ia tranferoi atë një izraeliti të vjetër në moshë ishte Dr Sonmez. Zoti Sonmez tha se ai nuk e kishte kryer operacionin vetë.

Sipas një raporti të senatorit Dick Marty, anëtarët e UÇK kishin vrarë serbë dhe kishin shitur organet e tyre. Dr Sonmez mohoi të dinte ndonjë gjë për këtë tregti dhe tha se kurrë nuk ishte takuar me personat që përmenden në raportin e Dick Martit.

Dr Sonmez ka qenë objekt i një hetimi edhe në 1998 kur një gazetar u paraqit si dikush që donte të shiste veshkën.

Dikur një avokat i zëshëm për legalizimin e tregtisë, ai është arrestuar disa herë me dyshimin se ka kryer transplante ilegale, por në çdo rast ai ka treguar dokumenta me firma të donatorëve.