Filmi, që mbështetet në historinë e krijimit të faqes Facebook, u cilësua filmi më i mirë dhe fitoi disa çmime, përfshirë atë për regjinë, skenarin dhe muzikën.

Seriali televiziv Glee, që ka në qendër një grup muzikor në shkollë të mesme, fitoi në kategorinë për komedinë dhe muzikalin më të mirë televiziv, si edhe dy çmime për aktorët dytësor.

Siç pritej, aktori britanik Colin Firth u cilësua si më i miri për një film dramatik, për rolin e tij në The King's Speech (Fjalimi i Mbretit).

Megjithëse ky film britanik ishte propozuar për shtatë Globe të Artë, çmimi i dhënë aktorit Firth ishte i vetmi që mori.

Nuk qe suprizë as çmimi i dhënë aktores Natalie Portman për rolin e saj dramatik në filmin Black Swan (Mjelma e Zezë).

Aktorja, që pret fëmijën e saj të parë, e përdori fjalën e rastit, për të falenderuar prindërit.

The Kids are All Right (Fëmijët janë mirë), që ka në qendër historinë e një çifti lezbikesh që bashkohen me babain biologjik të fëmijëve të tyre adoleshentë, fitoi një çmim në kategorinë e komedisë apo muzikalit më të mirë, si edhe një çmim për aktoren Annette Bening.

Christian Bale mori çmimin e parë të mbrëmjes për rolin e tij dytësor në filmin The Fighter (Luftëtari).

Johnny Depp që ishte propozuar për dy çmime në kategorinë për aktorin më të mirë të komedisë, u largua nga mbrëmja me duar bosh, pasi Paul Giamatti u cilësoi fitues në filmin Barney's Version.

Toy Story 3 fitoi në kategorinë e filmit më të mirë të animuar, kurse aktori Al Pacino u nderua për rolin e tij si aktivisti pro eutanazisë Jack Kervorkian në miniserialin You Don't Know Jack.

Veterani tjetër i Hollivudit, Robert De Niro u prit mjaft ngrohtë kur mori çmimin e karierës që iu dorëzua nga aktori Matt Damon.

Megjithatë ishte aktori Michael Douglas, që u prit me ovacione më këmbë, i cili kohët e fundit është mjekuar për kancerin në fyt.

Miliarderi Mark Zuckerberg, që është subjekti i filimit që fitoi Globin e Artë, u falenderua nga regjizori i filmit David Fincher dhe skenaristi Aaron Sorkin.