GUARDIAN shkruan se "Kina është gati të braktisë Korenë e Veriut".

Kina ka dhënë sinjale se është gati të pranojë bashkimin e dy Koreve dhe në mënyrë private po e distancon veten nga regjimi.

Sipas mesazheve diplomatike amerikane, zbulohet se zyrtarë të Pekinit e shohin aleatin e tyre "si fëmijë të përkëdhelur".

INDEPENDENT shkruan: "Tani e morëm vesh. Amerikës nuk i interesin padrejtësia në Lindjen e Mesme".

Kjo është përshtypja personale e Robert Fisk që shkruan për gazetën.

Sipas tij, "nuk është se diplomatët amerikanë nuk e kuptojnë Lindjen e Mesme, ata thjesht janë bërë të verbër para padrejtësive".

Sipas shkrimit në këtë gazetë, mesazhet e shumta të letërkëmbimit diplomatik, provojnë se politika e Uashingtonit për Lindjen e Mesme është në linjë me Izraelin dhe qëllimi kryesor është të inkurajojë vendet arabe që t'i bashkohen aleancës amerikano-izraelite kundër Irait.

Duke shkruar në DAILY TELEGRAPH, kreu i Komisionit për Zbulimin dhe Sigurinë, Sër Malcolm Rifkind, thotë se paaftësia e atyre që lanë gjurmët e dokumenteve nuk justifikon Wikileaks edhe sikur pjesa më e madhe e asaj që që është zbuluar deri më sot "t'i irritojë qeveritë më tepër sesa t'i alarmojë".

Sër Malcolm thotë se udhëheqësit demokratikë "duhet të lejohen që të kenë dialog privat dhe të mbrojtur" teksa përpiqen të zgjidhin disa nga problemet "më të vështira që ka njohur bota".

Në gazetën TIMES, Ben Macintyre shkruan se në të ardhmen diplomatët dhe politikanët do ta shtypin më tepër butonin "fshi" për gjithçka që ata konsiderojnë të debatueshme.

Të përditshmet e tjera si DAILY TELEGRAPH merren me zbulimet që kanë të bëjnë me Dukën e Jorkut, princin Andrew.

E përditshmja shkruan për një informacion që ka dalë nga Wikileaks e që tregon se si Duka e Jorkut gjatë një darke biznesi, atakoi hapur qeverinë britanike duke përdorur një gjuhë që e habiti ambasadorin amerikan.

Edhe e përditshmja TIMES përqëndrohet tek sulmi i Princit ndaj Zyrës britanike për Mashtrime Serioze si edhe fakti që ai u bë pjesë e një debati për francezët dhe amerikanët që u banalizua.

Në zhvillime të tjera, FINANCIAL TIMES shkruan se miliarda eurot e Bashkimit Evropian që u premtuan për të promovuar rritje ekonomike në rajonet prekura nga kriza, nuk po lëshohen pasi qeveritë kombëtare që ka vështirësi me financat nuk mund të gjejnë fondet e nevojshme për të lëvruar këto para.

Dokumente të brendshme nga Komisioni Evropian, që kanë rënë në duart e gazetës, tregojnë se deri tani BE ka paguar vetëm 10 për qind të mbi 340 miliard eurove të premtuara nga një fond kryesor.

"Marrëzia e BBC-së" e quan gazeta SUN programin investigativ Panorama të ditës së hënë, që ekzaminoi korrupsionin brenda FIFA-s.

Gazeta beson se koha e transmetimit të programit "duket e llogaritur për të dëmtuar në maksimun" shanset e Anglisë për të organizuar Kampionatin botëror të futbollit në 2018.

TIMES megjithatë beson se Anglia, jo vetëm që është "kandidatura më e mirë", por ajo gjithashtu kanë një shtyp të lirë "që të bën krenar" dhe shpreson se FIFA do t'i vlerësojë të dyja këto.