Reagimi në bursa për paketën ishte i përzierë

Daily Telegraph njofton se paqartësitë rreth paketës kanë çuar në rënie të ndjeshme të çmimece të aksioneve në bankat britanike.

Gazeta shpjegon se thirrjet për zgjedhje të përgjithshme në Republikën Irlandeze ngjallën frikën në tregje se qeveria mund të rrëzohet.

Guardian thotë se atmosfera ishte e ngjashme me atë të ditëve pas rënies së bankës Lehman Brothers.

Times ndërkohë argumenton se refuzimi për të kontribuar në paketën e shpëtimit do të dëmtonte bankat, tregtinë dhe financat publike të Britanisë së Madhe

Por e përditshmja Financial Times është e shqetësuar se huatë emergjente nuk do t'i zgjidhin problemet e Irlandës.

Sipas gazetës, sistemi bankar i vendit ka nevojë për reformë rrënjësore.

Zhvillime të tjera

Në zhvillime të tjera ndërkombëtare, Times në faqet e saj të brendshme shkruan për tragjedinë që ndodhi të hënën në kryeqytetin e Kamboxhias, Phnom Penh ku 339 vetë humbën jetën pasi turma njerëzish të mbledhur për një festival popullor, i kapi paniku.

"Kjo ishte tragjedia më e madhe në Kamboxha që nga regjimi i Pol Potit," citon gazeta kryeministrin e vendit.

Guardian i kushton vëmendje përpjekjeve që po bëjnë kandidatët për deputetë nga rradhët e opozitës në Egjipt për të bërë fushatë për zgjedhjet parlamentare që mbahen në vend të dielën.

"Kandidatët e pavarur shpallin fitore ndërsa partia në pushtet e Mubarakut zhytet në kaos", shkruan gazeta.

E përditshmja Independet boton në faqe të parë një fotografi të kriminelit nazist, Samuel Kunz, që vdiq në Gjermani javëne shkuar në moshën 89 vjeçare.

Gazeta beson se procesi i daljes në gjyq i të dyshuarve për krime naziste, duhet të përshpejtohet në interes të drejtësisë.

Imigracioni

Financial Times shkruan se qeveria britanike pritet të miratojë të martën një marrëveshje për kufizimin e emigracionit në vend.

Autoritete pritet të bëjnë të ditur një kufizim në numrin e emigrantëve me kualifikim të lartë nga vendet jashtë BE-së që mund të punojnë në Britaninë e Madhe.

E përditshmja Daily Telegraph po në faqen e parë njofton se qeveria britanike pritet të sinjalizojë dhe kufizimin e numrit të studentëve të huaj që studiojnë në kolegjet private në vend për të ndihmuar në uljen e imigracionit.

Ministria e brendshme britanike pritet të njoftojë një periudhë konsultimesh për rishikim e procesit të vizave për studentët, shkruan gazeta, mes shqetësimeve se pothuajse gjysma e migrantëve që vijnë në Britani për të studiuar përvit, nuk kryejnë studime në nivel universitar, por në nivel më të ulët.