Obama kërkoi bashkëpunim nga republikanët

"Obama pranon se duhet të punojë më mirë pas humbjes në zgjedhje," shkruan Guardian dhe në legjendën e fotografisë së presidentit që boton po në faqen e parë shkruan se pas disfatës, ai dukej se po "reflektonte".

Daily Telegraph zgjedh të vërë në titull pranimin e presidentit se duhet të bëjë një punë më të mirë.

"Obama pranon fajin" shkruan Times në faqen e parë dhe shton se Obama e ka pranuar se Republikanët i kanë dhënë një goditje të fortë.

Në artikull gazeta shkruan se në një konferencë shtypi, presidenti e kishte pranuar se nuk ia kishte dalë të pakësonte më shpejt nivelin e papunësisë, por refuzoi ta pranonte se humbja e partisë së tij ishte rezufim i politikave të tij.

Sfida

Independent ndërkohë e vë theksin tek vështirësitë që e presin presidentin tani, kur do t'i duhet të punojë me një Dhomë Përfaqësuesish ku kundërshtarët e tij Republikanë kanë shumicën.

"Flet për konsensus, por Obama përballet me një betejë të gjatë e të vështirë," shkruan gazeta në faqen e parë.

Ajo shton se rezultatet pozitive që shënuan Republikanët në zgjedhjes e mesmandatit të martën dhe mbërritja në Capitol Hill e lëvizjes Tea Party do ta "intensifikoje staniacionin në Washington".

Financial Times ndërkohë shkruan në artikullin e saj po në faqen e parë "Obama u bën thirrje republikanëve për mbështetje".

"Presidenti Obama i nxiti republikanët fitimtarë që të punojnë bashkë për inisiativa të reja për të krijuar vedne pune dhe për të ripërtërirë ekonominë pas humbjes më të madhe (të demokratëve të tij) në Kongres në mbi gjysëm shekulli".

Po kjo gazetë kryeartikullin ia kushton vendimit të Bankës Qendrore Amerikane për ta stimuluar ekonominë me 600 miliardë dollarë.

Masa sigurie

Në zhvillime të tjera, Financial Times njofton në faqet e saj ndërkombëtare se ministrat e brendshëm të BE-së pritet që të diskutojnë të hënën e ardhshme në Bruksel masat e sigurisë për avionët e mallrave.

Ky vendim është marrë pas zhvillimeve të ditëve të fundit në Jemen dhe më pas në Greqi.

Times shkruan se një takim në nivel ekspertëve për zbulimin e bombave do të zhvillohet që nesër për të diksutuar mundësinë e forcimit të masave për transportin ajror të mallrave.

"Kërcënimi terrorist egziston ende," citon gazeta një zëdhënës të Komisionit Evropian "duhet të mbetemi aktivë dhe vigjilentë".

Papandreou dhe Berlusconi

FT ndalet dhe në zgjedhjet lokale që priten të mbahen në Greqi të dielën dhe shkruan se këto zgjedhje shihen si një referendum për planin e shpëtimit të ekonomisë greke nga Be-ja.

Gazeta shkruan se kryeministri i vendit Papandreou ka deklaruar se do të thërrasë zgjedhje të jashtëzakonshme nëse partia e tij PASOK, nuk do të arrijë të fitojë postet kyçe të guvernatorëve rajonalë.

Telegraph shkruan dhe për telashet e fundit, të një natyre krejt tjetër, të një udhëheqësi tjetër Evropian, Silvio Berlusconit.

"Shumica e Italianëve menduan se Berlusconi nuk mund ta ulte dot më poshtlë reputacionin e vendit," shkruan gazeta.

Ajo shton se dje u bënë publike pretendime të reja nga një prostitutë se avioni i tij privat ishte përdorur për të furnizuar me marihuanë mbrëmjet e seksit të zhvilluara në vilat e tij në Sardenjë.