DAILY TELEGRAPH njofton se David Cameron është i përgatitur "të zbrapset" nga premtimi i tij për të negociuar një ngrirje apo një ulje të buxhetit të BE-së, kur të takohet me udhëheqësit evropianë në Bruksel.

Gazeta paralajmëron në kryeartikullin e vet se madje edhe pas samitit, kryeministri më "euroskeptik britanik këto 20 vjet", përballet me një seri sfidash të vështira.

Dhe në këto sfida, TELEGRAPH rreshton bisedimet për buxhetin e BE-së për 2014 -2020 dhe planet për forcimin e zonës euro, që mund të kërkojë edhe amendamente të Traktit.

Zoti Cameron, deklaron gazeta, pritet të zbulojë se çështja evropiane "është duke u rikthyer përsëri në jetë".

FINANCIAL TIMES hapet me titullin "Merkel kërkon të rishkruajë traktatet evropiane."

Kancelarja Angela Merkel u bëri ftesën për duel partnerëve evropianë, duke këmbëngulur që ata të pranojnë të rishkruajnë pjesë të traktateve evropiane për të siguruar të ardhmen e stabilitetit të monedhës së përbashkët evropiane.

DAILY MAIL thotë se nëse kryeministri arrin që të vendoset një kufi në buxhet, atëherë David Cameron është gati që të mbështesë ndryshimet në ligjet evropiane që janë prezantuar nga Gjermania dhe Franca, për sa kohë këto ligje nuk aplikohen në Britaninë e Madhe.

FINANCIAL TIMES dhe GUARDIAN duken të sigurta se Britania dhe Franca do të arrijnë të nënshkruajnë një traktat për Mbrotjen javën e ardhshme.

Gazetat besojnë se ky traktat do të sjellë një bashkëpunim të paprecedent.

Sipas FINANCIAL TIMES, kjo do të thotë se brezi i ri i avionëve shumë të shpejtë luftarakë britanikë, do të ngrihet nga aeroporti Charles de Gaulle.

GUARDIAN shkon më tej duke njoftuar se bashkëpunimi në fushën e mbrojtjes mund të zgjerohet në tre degët e forcave të armatosura dhe këtu mund të përfshihen edhe teste të simuluara bërthamore.

Ndërsa DAILY TELEGRAPH në faqe të parë ka lajmin se migrantët e kualifikuar janë duke kryer punë që nuk kërkojnë shumë kualifikime.

Vetëm një ndër katër punëtorë të huaj që janë lejuar të hyjnë në Britani si punëtorë me kualifikime të larta, kryejnë punë që kërkon zanat të caktuar.

Ministria e Brendshme britanike që i publikoi këto rezultate tha se nuk dihej saktësisht se me çfarë punësh merreshin gjysma e migrantëve të kualifikuar.

Këto zbulime, shkruan gazeta, tregojnë se mijëra të huaj janë duke shfrytëzuar rrugët, përmes së cilave është e lehtë të merret një vizë për në Britani dhe më pas ata kryejnë punë që mund të bëhen nga vendasit, si shitës apo asistentë nëpër dyqane.