Ky zbulim shoqërohet me spekulime dhe me informacione që kanë dalë nga raporti që prezanton të mërkurën ministri përgjegjës për Financat.

GUARDIAN thotë se planet për të rritur moshën e pensionit në 66 vjeç do të afrohet në 2016, ndërsa departamenti i Thesarit më në fund është tërhequr nga planet për të hequr shumën që marrin familjet me fëmijë në moshën 17 dhe 18 vjeç.

FINANCIAL TIMES thotë se ministri për Financat, George Osborne ka "zbuluar" në minutën e fundit disa miliard stërlina që mund të përdoren për të financuar projektet e zhvillimit.

DAILY TELEGRAPH, thotë se ka zbuluar më shumë se 13 miliard stërlina në shkurtime në fondet për mirëqënien sociale.

TIMES megjithatë shkruan se pavarësisht se ku do të bjerë sopata e shkurtimeve, ato nuk do të zgjidhin ato që e përditshmja i sheh si problemet më të mëdha.

INDEPENDENT pajtohet, se teksa qeveria mund të përpiqet të bëjë më shumë për më pak para, shkurtimet janë etapa e parë e një tërheqjeje të madhe nga përgjegjësitë shtetërore.

Ngrirja e ndryshimit të tarifës që paguhet nga shtetasit britanikë për transmetimet televizive tokësore, nxjerr vetëm një fitues nga shkurtimet, shkruan TIMES. Paguesit e tarifës.

BBC-ja financohet pikërisht nga fondet e mbledhura nga kjo tarifë dhe ky vendim i ka bërë të lumtur drejtorët ekzekutivë të korporatës pasi do të ketë një stabilitet.

Por BBC-ja si e tërë përballet me një ulje prej 340 milion stërlinash të fondeve, shkruan FINANCIAL TIMES, kjo shumë përbën edhe një të dhjetën e buxhetin të gjitha radiove kombëtare të marra sëbashku.

Kjo ulje prej 340 milionësh, shpejgon FT vjen pasi BBC ka pranuar që të financojë edhe Shërbimin Botëror të BBC-së dhe BBC Monitoring, këto shërbime deri tani financoheshin nga Foreign Office, kanalin S4C në gjuhën galeze të Uellsit si edhe do të paguajë koston e kapitalit të planeve të qeverisë për televizion lokal.

Edhe shkurtimet në buxhetin për Mbrojtjen që u njoftua të martën, tërheqin komente në shtyp.

TELEGRAPH thotë se mund të kishte qënë edhe më keq, pas trashëgimisë të lënë nga laburistët.

TIMES beson se këto shpenzime ishin të nxituara dhe do ta lënë Britaninë një "forcë të zvogëluar globale".

DAILY EXPRESS shkruan për rritjen e madhe të çmimit të karburanteve, të shkaktuar në një farë mase edhe nga mungesat në Francë.

DAILY MIRROR shkruan se benzina pa plumb mund të shkojë brenda disa javëve në 1.25 stërlina për litër.

Ekspertët financiarë kanë paralajmëruar se pasojat e inflacionit mund t'i rrisin shanset për një recesion të dyfishtë.

Ne faqet sportive gazetat shkruajnë edhe për largimin e mundshëm të sulmuesit Wayne Rooney nga Manchester United pas konfirmimit të lajmit nga menaxheri sër Alex Ferguson.

INDEPENDENT thotë se Rooney dëshiron të kalojë tek rivalët e United, Manchester City, ndërsa DAILY MIRROR flet për një transfertë me vlerë 80 milion stërlina.

Por FINANCIAL TIMES beson se United do ta ketë të vështirë të caktojë vlerën e sulmuesit Rooney për shkak të kufizimeve financiare të klubeve kryesore të Evropës.