Arbër Vllahiu BBC, Prishtinë

	Kreu i Vetëvendosjes u arrestua ditën e shtunë në Prishtinë

Megjithatë gjykata e la menjëherë të lirë zotin Kurti, meqë siç thuhet, ai e ka kryer dënimin gjatë administrimit të Kosovës nga misioni i OKB-së.

Paneli i gjykatësve ndërkombëtarë i shqiptoi dënimin zotit Kurti, pas seancës njëditëshe gjyqësore, për veprën e pengimit të personave zyrtarë në detyrë.

Më herët gjatë ditës prokurori i çështjes hoqi dorë nga dy akuza të tjera që e ngarkonin zotin Kurti për pjesëmarrje në një protestë në vitin 2007 që përfundoi me dy viktima.

Seanca e sotme gjyqësore filloi pas një numri shtyrjesh meqë zoti Kurti nuk u paraqit në gjykatë me arsyetimin se nuk e njihte institucionin e drejtuar nga EULEX-i.

Ai u paraqit për herë të parë në gjykatë pasi dy ditë më parë u arrestua në mënyrë të dhunshme nga Policia e Kosovës, në kohën kur paralajmëroi pjesëmarrjen ne zgjedhjet e përgjithshme të vitit 2011.

Misioni evropian për sundimin e ligjit nuk e komentoi vendimin e gjyqit, por tha se e mirëpriste punën e policisë së Kosovës, prokurorisë dhe të gjykatësve.

Lëzivja Vetëvendosja ende nuk e ka komentuar vendimin, megjithëse gjatë ditës ka deklaruar se do të sillet sipas rrethanave që do të krijohen gjatë seancës.

Albin Kurti ka deklaruar në gjykatë se nuk e njeh gjyqin e misionit evropian për sundimin e ligjit.