Robert Goro BBC Athinë

	Sondazhi i Bloomberg tregoi se analistët ishin pro daljes së Greqisë

Vlerësimi rezultoi në një sondazh të publikuar nga agjencia informative Bloomberg, dhe shkaktoi alarm e panik në Athinë.

Kryeministri, por edhe unioni bankar vendas theksuan se vlerësimet nuk kanë asnjë bazë dhe se Greqia do t’i realizojë objektivat e saj në kuadër të planit për stabilitet ekonomik.

Ndërkohë, inflacioni në vend ka shënuar rritjen më të lartë pas 13 vjetësh.

Sondazhet për euron

Hamendjet se Greqia do të dalë nga zona e euros dhe se po përgatitet t’i rikthehet monedhës së vet kombëtare, dhrahmisë, u rishfaqën më intensivisht orët e fundit.

Agjencia informative Bloomberg publikoi një sondazh, sipas të cilit 41% e investitorëve dhe analistëve të çështjeve ekonomike, besojnë se Greqia do të detyrohet të dalë nga eurozona.

Përkundër këtyre, 34% e konsiderojnë të pamundur këtë zhvillim.

Sapo u publikua lajmi, qeveria ndërmori menjëherë një aksion intensiv përgënjeshtrimesh, ndaj asaj që kryeministri Papandreu e cilësoi si “skenar keqdashës”.

“Do të doja të përgënjeshtroja gjithë skenarët keqadashës që qarkullojnë për ekonominë greke. Jemi në rrugë të sigurt për të realizuar në mënyrë të qëndrueshme objektivat tona ekonomiko-financiarë."

"Dua të theksoj dhe të garantoj që, po të mos biem preh e kësaj thashethemnaje të pabazë që qarkullon ndërkombëtarisht, Greqia do të dalë më e fortë nga kjo krizë”, deklaroi të martën vonë zoti Papandreu.

Ndërsa ministri i Financave, Jorgos Papakonstandinu, nga Luksemburgu ku ndodhej, në takimin e ministrave të Financave, i cilësoi parashikimet si qesharake.

"Po ndjek i befasuar një thashethemnajë në Athinë, për një dalje të pritshme nga eurozona. Këto janë qesharake, asgjë më shumë", tha ai.

Në të njëjtën linjë u shpreh edhe kreu i unionit të bankave greke, Vasilis Rapanos.

Situatë e vështirë

Përkundër optimizmit të shprehur nga kryeministri, mbi ndikimin pozitiv të masave të marra, zhvillimet në terren vlerësohen si shqetësuese.

Sipas autoritetit statistikor grek, inflacioni në muajin maj u rrit në 5,4% nga 4,8% që ishte një muaj më parë.

Sipas analistëve ky është një rekord historik, teksa hera e fundit që inflacioni kishte regjistruar shifra kaq të larta ishte në gusht të vitit 1997.

Analistët vlerësojnë se shkaku i kësaj rritjeje gjendet në shtimin e taksave për karburantet, pijet alkoolike dhe cigaret, si dhe rritjen e TVSH-së, që u vendosën në kuadër të masave për stabilitetin ekonomik.

Situata pritet të përkeqësohet edhe më taj, pasi në muajin korrik hyn në fuqi shtimi i TVSH-së me 2% më shumë, por edhe rritje të reja të taksave në karbuante dhe cigare.

Por jo vetëm kaq. Greqia sivjet pritet të ketë një prurje më të pakët turistësh, me një ulje që vlerësohet në rreth 10% më pak e vitin e kaluar, ndërkohë që një tjetër sektor i rëndësishëm i ekonomisë, ndërtimi, ndodhet në prag të falimentimit.

Unioni i shoqërive anonime ndërtimore, në një letër drejtuar ministrin të Financave dhe atij të infrastrukturës, e konfirmon këtë parashikim, duke theksuar se shteti grek u ka këtyre kompanive një borxh prej 1,5 miliardë euro për vepra publike që janë ndërtuar dhe nuk janë shlyer ende.

Ky fakt, theksojnë ata, ndërthurur me mungesën e parave të thata në treg dhe refuzimin e bankave për të dhënë kredi, por edhe me rënien drastike të veprimtarisë ndërtimore në vend, e shpien sektorin e ndërtimeve drejt falimemtimit.

Në kushtet që dy sektorët më produktivë të ekonomisë greke, turizmi dhe ndërtimet, parashikohet të përjetojnë sivjet një situatë kolapsi, përpjekjet fisnike të qeverisë për shëndoshje të gjendjes ekonomike, vihen në ikëpyetje të madhe, vlerësojnë analistët.