Fatos Ahmati BBC Tiranë

	Qeveria ka thënë se vendimi do të shoqërohet me rritje pagash

Një ligj i posaçëm pritet të miratohet në fillim të muajit korrik.

Megjithatë qeveria përsërit se ka vendosur që po në muajin korrik të shpallë rritjen e rrogave dhe pensioneve.

Intervistë me deputetin e PD-së, Sherefedin Shehu

Opozita është skeptike për këto masa të qevërisë, ndërsa kjo e fundit thotë se po tregohet e kujdesshme për të mos shkuar në situatën e vendeve evropiane.

Intervistë me deputetin e PS-së, Arben Malaj

Vetëm pak ditë më parë ministri shqiptar i Financave, Ridvan Bode bëri të ditur se Shqipëria ka një borxh publik prej rreth 60 për qind të prodhimit të përgjithshëm bruto, por sipas tij kjo nuk është problematike.

Zoti Bode tha se kostoja e borxhit të Shqipërisë është më e ulta në të gjithë rajonin, 3 për qind e prodhimit të përgjithshëm bruto, çka tregon kapacitetin që kanë financat publike shqiptare në shërbimin e borxhit.

Ministri Bode bëri të ditur se në vitin 2013 borxhi publik në Shqipëri do të zbresë në 53 për qind të prodhimit të përgjithshëm bruto.

Por nga ana e saj opozita e shikon me shqetësim situatën e krijuar.

Sipas saj që nga viti 2007 ky borxh është dyfishuar dhe në shifra absolute ai është në rreth 900 milionë dollarë.

Gjithnjë sipas opozitës qeveria shpenzon shumë më tepër se ja lejon rritja e të ardhurave që ajo realizon, duke krijuar një situatë shumë shqetësuese për ekuilibrin makroekonomik të vendit.

Analistë të ndryshëm të ekonomisë e vlerësojnë situatën kritike, por brenda kufijve të menaxhimit, ndërsa bëjnë thirrje për kthim tek politikat e FMN.

Në këto kushte, çështja e borxhit publik të Shqipërisë pritet të jetë edhe në të ardhmen një nga temat e nxehta të debatit midis maxhorancës dhe opozitës.