Vatikani çmon lart transparencën dhe vendosmërinë e Papës.

Në deklaratën zyrtare, Vatikani thotë se autoritetet civile, pas hetimeve të kryera, kishin vendosur për pushimin e çështjes.

Rasti dhe akuzat

At Lawrence Murphy kishte abuzuar në mënyrë sistematike me fëmijët në një shkollë për personat që nuk dëgjojnë në Wisconsin.

Njoftohet se në vitet 90-të, eprori i at Murphy-t i kishte shkruar dy herë Papës, atëherë Kardinali Ratzinger me detyrë mbikqyrjen e moralit të kishës. Kardinali nuk kishte kthyer përgjigje. Pas ca kohësh at Murphy ishte hequr nga detyrat publike si prift, por nuk i ishte kërkuar të largohej nga kisha.

Qëndrimi publik dhe reagimi i kishës

Analistët dhe viktimat e abuzimit thonë se Papa Benedikti nuk kishte marrë masa dhe madje e akuzojnë atë për përfshirje në fshehjen e fakteve për të mbrojtur kishën. Ata duan që Kreu i Vatikanit të tregojë se çfarë dinte në rastin e at Murphy-t dhe përse nuk kishte ndërhyrë.

Kreu i Kishës Katolike Romane në Angli dhe Uells, kryepeshkopi Vincent Nichols, tha se gjatë atyre viteve Ati i Shenjtë kishte bërë ndryshime të rëndësishme për forcimin e ligjeve të kishës kundër abuzuesve të fëmijëve.

Gazeta e Vatikanit, Osservatore Romano, shkruan për "transparencën, vendosmërinë dhe rreptësinë e Papës" në të gjitha rastet e abuzimeve seksuale dhe i cilëson njoftimet e shtypit si përpjekje për ta njollosur me çdo kusht figurën e Tij, njofton korrespondenti i BBC-së në Romë, Duncan Kennedy.

Ndërkaq, peshkopët francezë i kanë dërguar kreut të Vatikanit një letër mbështetjeje ku shkruajnë për turpin dhe keqardhjen që ndjejnë për abuzimin e fëmijëve nga priftërinjtë katolikë.