Ruhet koalicioni qeverisës në Kosovë

Si Partia Demoraktike e Kosovës e kryministrit Hashim Thaçi ashtu edhe Lidhja Demoraktike e Kosovës e presidentit Fatmir Sejdiu kanë deklaruar se do të ruajnë strukturën ekzistuese qeverisëse.

PDK-ja tha nëpërmjet një deklarate se "është fuqimisht e përkushtuar për stabilitetin funksional të institucioneve qendrore të Kosovës dhe për procesin e shtetndërtimit".

PDK-ja thotë se zgjedhjet e 15 Nëntorit, që, sipas saj, ishin të lira, të drejta, demokratike dhe gjithëpërfshirëse "nuk do të mund të ndikojnë në funksionimin e mirë të institucioneve qendrore: Parlamentit, Presidentit dhe Qeverisë".

Një deklaratë të ngjashme bëri edhe LDK-ja pas një mbledhjeje të kryesisë së saj nëpërmjet nënkryetarit të saj Ekrem Kryeziu.

"LDK do të vazhdojë të angazhohet me përgjegjësi për funksionimin dhe zbatimin e obligimeve shtetërore nga parneriteti që dalin në nivelin qëndror e që është me rëndësi parësore për funksionimin e institucioneve qëndrore shtetërore të Republikës së Kosovës, presidencës, parlamentit dhe qeverisë në pajtim me kushtetutën dhe ligjin," thuhet në deklaratën e LDK-së.

Përplasje

Deklarata e fundit e PDK-së, pason qëndrimin e të njëjtës parti, vetëm 10 orë më parë, për mundësinë e, siç thuhet, "riformatizimit të koalicionit qeverisës në nivel qendror".

Zyrtarë të lartë të PDK-së thanë se shkak për këtë qëndrim ishin "shkelja të marrëveshjes së koalicionit" nga ana e partnerit të saj - LDK-së.

LDK-ja thotë se mbetet e përkushtuar për stabilitetin e vendit.

"LDK-ja është parti e përgjegjeshme dhe objektiv parësor ka stabilitetin e vendit," tha zoti Kryeziu.

"Zgjedhjet lokale të 15 nëntorit i kanë dhënë një provë të fuqishme pjekurisë dhe demokracisë në Kosovë në të cilin Lidhja Demokratike e Kosovës ka dhënë kontribut madhor," tha ai.

Megjithatë, zoti Kryeziu tha se në raundin e dytë të zgjedhjeve lokale LDK-ja "do të krijojë partneritet me partnerë të ndryshëm sipas specifikave në cilës komunë".

Gjatë mbrëmjes së kaluar u përfol shumë për mundësinë e krijimit të një koalicioni të ri qeverisës ndërmjet PDK-së dhe Aleancës për Kosovën e Re (AKR) e Lidhjes Demokratike të Dardanisë (LDD) pas qëndrimit të PDK-së për mundësinë e prishjes së koalicionit me LDK-në.

Mirëpo edhe AKR-ja, edhe LDD-ja përjashtuan mundësinë e bisedimeve të mundshme të zhvilluara për koalicion qeverisës.