Kryeministri Hashim Thaçi vlerëson zgjedhjet

Sipas autoriteteve të zgjedhjeve pjesëmarrja e përgjithshme në votime ka arritur deri në 45 përqind e elektoratit.

Kryeministri Hashim Thaçi tha se zgjedhjet ishin "më të rëndësishmet që nga shpallja e pavarësisë."

"Ne sot konfirmojmë se vendi ynë ka merituar të jetë i pavarur dhe të ketë një perspektivë evropiane," tha zoti Thaçi.

Ende nuk kanë dalë rezultatet e zyrtare, por partitë politike po shpallin rezultatet që ato kanë arritur në komunat e Kosovës.

Kryeministri Thaçi tha se Partia e tij Demokratike e Kosovës ka arritur "një fitore bindëse" në shumicën e komunave të vendit.

Lidhja Demokratike e Kosovës thotë se ajo ka siguruar mbështetjen e shumicës së elektoratit dhe ka fituar postin e rëndësishëm të kreut të komunës së kryeqytetit Prishtinë.

Rezultatet e shpallura nga partitë e ndryshme ende nuk janë konfirmuar zyrtarisht nga KQZ-ja, e cila po publikon pjesë-pjesë rezultate nga komuna të ndryshme të Kosovës.

Zgjedhjet janë vlerësuar si një shans i rëndësishëm për qeverinë e Kosovës që ajo të tregojë që mund të organizojë zgjedhjet të lira dhe të ndershme.

Zoja Bujupi tha për BBC-në se ajo po votonte "për të mirën e shtetit, për të mirën e të gjithë ne".

Pjesëmarrja serbe

	Është vënë re pjesëmarrje më e madhe e serbëve.

Serbët në veri të Kosovës kanë bojkotuar zgjedhjet e para pas shpalljes së pavarësisë.
KQZ-ja ka njoftuar se asnjë qytetar serb në Zveçan, Zubin Potok dhe Leposaviq nuk ka votuar, duke iu bindur kështu thirrjeve të qeverisë dhe kishës serbe për bojkot.

Ekipe lëvizëse kanë qenë të pranishme në këtë pjesë të Kosovës për të mundësuar procesin e votimit. Kjo pasi banorët lokalë serbë nuk lejuan hapjen e qendrave të votimit në shkolla.

Një korrespondent i BBC-së në rajon thotë se njoftimet paraprake kishin treguar një pjesëmarrje më të madhe të serbëve, seç pritej.

Në Kosovën Qëndrore dhe në atë Lindore pjesëmarrja e serbëve ka qenë më e lartë se sa në zgjedhjet e deritanishme.

Në tri komunat e reja me shumicë serbe, në Graçanicë dalja e votuesve ka shkuar në mbi 23 përqind, në Ranillugë afër 14 përqind ndërsa në Kllokot rreth 25 përqind.

Një nga kandidatët serbë për kryetar komune në rajonin me shumicë serbe të Graçanicës, Momçillo Trajkoviq, tha se votimi përbënte një "udhëkryq për serbët e Kosovës."

"Ne besojmë se pjesëmarrja në zgjedhje është e keqja më e vogël, dhe është e mundur që kjo e keqe më e vogël të kthehet në diçka të mirë," tha zoti Trajkoviq, që është kryetar i Lëvizjes Serbe të Rezistencës.

Zgjedhje të qeta

Vëzhguesit pritet t'i njoftojnë ditën e hënë nëse zgjedhjet i kishin përmbushur standartet ndërkombëtare.

Vlerësimet për mbarëvajtjen e zgjedhjeve lokale në Kosovë ka qënë përgjithësisht pozitive, megjithë disa incidente të vogla që KQZ i konsideroi të parëndësishme.

Në Kosovë u votua për kryetarët dhe asambletë e 36 komunave të Kosovës.

Kryetarja e Komisionit Qendror të Zgjedhjeve, zonja Nesrin Lushta, deklaroi në mesditë se shumica absolute e vendvotimeve ishin hapur që në orën 7.

"Në disa qendra votimi, kryesisht në veri të Kosovës, kjo nuk ka qënë e mundur," tha zonja Lushta.

Zëdhënësi i policisë së Kosovës Baki Kelani, deklaroi se votimet kishin kaluar pa incidente, me përjashtim të një rasti në veri të Kosovës.

Mbi 100 vëzhgues ndërkombëtarë dhe mbi 20 mijë vëzhgues vendorë gjatë gjithë ditës kanë qënë në terren për të parë nga afër rrjedhën e votimeve.

Në mesin e vëzhguesve ishte edhe një delegacion i Këshillit të Evropës, që kryesohet nga eurodeputetja Doris Pack.

Ismet Kryeziu, përfaqësues i kolacionit të organizatave joqeveritare "Demokracia në veprim" që monitorojnë zgjedhjet, ka folur për "disa raste të votimeve të dyfishta."

Rreth 1,5 milion shtetas me të drejtë vote kanë patur mundësi të votojnë për kryetarët e 36 komunave dhe anëtarët e asambleve komunale, mandati i të cilëve këtë herë do të zgjasë katër vjet.

Kryetarët e komunave zgjidhen sipas sistemit të shumicës, ndërkaq për deputetët e asambleve aplikohet sistemi proporcional.

Për zgjedhjet janë çertifikuar edhe 22 subjekte politike serbe.

Një korrespondent i BBC-së në Prishtinë tha se atmosfera e zgjedhjeve kuptohej më tepër nga prania e posterave elektoralë.

Dita e votimeve në kryeqytet i ngjante një të djele të zakonshme dhe njerëzit flisnin për to, vetëm nëse i pyesje, thotë korrespondenti.