Autoritetet kërkojnë të bëhet kujdes me higjienën

Instituti i Shëndetit Publik njoftoi se 19 raste të reja të personave të infektuar me këtë virus janë regjistruar në 24 orët e fundit.

Kjo e çon numrin e të prekurve prej tij në 76, por autoritetet shëndetësore thonë se situata është nën kontroll dhe se rritja e numrit të të prekurve nuk është shkak për panik.

Zyrtarë të Institutit të Shëndetit Publik në Tiranë pohojnë se të gjitha rastet e raportuara deri tani janë të lehta dhe pa komplikacione, ndërsa vetëm dy prej tyre po mjekohen në spitalin e Tiranës.

Situata 'nën kontroll'

Të dhënat tregojnë se për 46 raste mostrat janë marrë në spitalet në Tiranë, ndërsa rastet e tjera u takojnë dhe spitaleve në Durrës, Mat, Gjirokastër, Berat, Devoll, Sarandë.

Ndërkohë, që prej fillimit të javës kanë filluar të vërehen raportime me raste infeksionesh respiratore në disa shkolla në Tiranë dhe në Mat.

Sipas autoriteteve shëndetësore, kjo është vala e dytë e epidemisë së gripit të derrave, që u shfaq për herë të parë në muajin prill.

Ministria e Shëndetësisë ka bërë të ditur se është siguruar sasia e nevojshme e vaksines kundër virusit dhe është shpërndarë sasi rezervë e saj në të gjitha spitalet rajonale të vendit.

Ndërkohë, autoritetet shëndetësore thonë se për të parandaluar përhapjen e virusi duhet të vazhdoje ndërgjegjësimi i publikut lidhur me masat e higjienës personale dhe kolektive.