Violeta Hyseni BBC Prishtinë

	Incidenti ndodhi në Deçan, në perëndim të Kosovës

Zëdhënësi i policisë, Baki Kelani, tha se një grup qytetarësh kanë sulmuar me gurë eskortën e kryeministrit, gjatë largimit të saj nga Deçani për në drejtim të qytetit të Gjakovës, ndërsa në afërsi janë dëgjuar edhe të shtëna armësh.

Lidhur me rastin e mbrëmshëm policia thotë se po bën hetime dhe ekzaminime në vendin e ngjarjet.

Zëdhënësi Baki Kelani tha se ka pasur dëmtime në xhamat e makinave, por nuk ishte në gjendje të thotë se për sa makina ishte fjala dhe të çfarë përmasave ishin këto dëmtime.

"Si rezultat i reagimit të menjëhershëm të zyrtarëve policorë është arritur që të arrestohen tre persona si të dyshuar të mundshëm, të përfshirë në këtë rast, ndaj të cilëve është ngritur procedura hetimore," tha zëdhënësi Kelani.

Policia po ashtu nuk ka dhënë asnjë detaj se kush janë personat e dyshuar të kenë qenë të përfshirë në këtë sulm dhe nëse ata janë njerëz që i kanë ikur drejtësisë, siç ka pohuar Partia Demokratike e Kosovës.

Zëdhënësi Kelani tha se hollësitë për incidentin do të bëhen të ditura pas përfundimit të hetimeve, të cilat nuk dihet sa do të zgjasin dhe nuk pranoi të komentojë akuzat e ndërsjella të partive politike.

Dënohet incidenti

Incidenti është dënuar ashpër nga institucionet vendore dhe ndërkombëtare në Prishtinë.

Presidenti Fatmir Sejdiu ka theksuar se veprimet që bien ndesh me ligjin, që cënojnë jetën apo sigurinë e të tjerëve, janë krejtësisht të papranueshme.

Ai u ka bërë thirrje subjekteve politike dhe të gjithë qytetarëve të vendit që të sillen në mënyrë dinjitoze, të jenë të përmbajtur dhe të vazhdojnë të tregojnë kulturë politike, në mënyrë që zgjedhjet e para pas shpalljes së pavarësisë të jenë të suksesshme.

Qeveria ka ftuar të gjithë nxitësit e dhunës që të ndalojnë këto sjellje, të kërkojnë falje dhe të sillen në frymën e demokracisë.

Ndërhyrja në procesin zgjedhor, është një shkelje e rëndë dhe aktet kriminale te nxitura politikisht do të ndiqen penalisht nga organet përgjegjëse, thuhet në reagimin e qeverisë.

Përfaqësuesi i Posaçëm i Bashkimit Evropian, Pieter Feith, ka bërë thirrje që fushata për zgjedhjet komunale të vazhdojë në mënyrë të qetë.

Ai tha se aktet e dhunës nuk kanë vend në një fushatë zgjedhore demokratike.

"Shpreh keqardhjen për incidentin e djeshëm në Deçan i cili nuk ishte në interesin e askujt," tha zoti Feith.

"Kam folur me Kryeministrin dhe me zotin Haradinaj, kam marrë garanci të qarta se fushata dhe dita e zgjedhjeve do të vazhdojnë në atmosferë të qetë," tha zoti Feith.

Ambasada amerikane dhe ajo britanike kanë shprehur shqetësim për incidentin në Deçan.

Ambasadori i SHBA-së, Christofer Dell tha se dhuna nuk ka vend në fushata, zgjedhje, apo procesin demokratik.

"Pohimet lidhur me dhunën, të bëra nga një parti, kursesi nuk i arsyetojnë përgjigjet e dhunshme nga të tjerët," thuhet në reagimin e ambasadës amerikane.

Ndërsa ambasadori britanik, Andy Sparks, u ka bërë thirrje AAK-së dhe PDK-së të tregojnë përmbajtje dhe mos të lejojnë që ky incident fatkeq të përshkallëzohet më tutje.

Ai nënvizoi se deri tani fushata elektorale ka qenë e qetë dhe e udhëhequr në frymën demokratike dhe për hir të Kosovës dhe reputacionit të saj, ajo duhet të vazhdojë të jetë e tillë.

Akuza të ndërsjella

Partia Demokratike dhe Aleanca për Ardhmërinë e Kosovës, që ka pushtetin vendor në Deçan, kanë akuzuar njëra-tjetrën për incidentin.

PDK-ja e kryeministrit Thaçi ka thënë se "të organizuar drejtpërdrejtë nga Ramush Haradinaj, duke përdorur edhe njerëz të inkriminuar dhe të ikur nga drejtësia, në Deçan u provua të përdhoset dhe të frikësohet vota e lirë e qytetarëve.".

"I kujtojmë Ramush Haradinajt se pushteti fitohet me votën e vullnetit të lirë dhe jo me dhunë e armë," thuhet në reagimin e PDK-së.

AAK-ja e ka akuzuar kreun e PDK-së Thaçi dhe njerëzit nga partia e tij se "kanë keqpërdorur dhe abuzuar nxënës të gjimanzit të Deçanit, me moshë të mitur dhe kanë përdorur dhunë ndaj tyre në tubimin parazgjedhor të PDK-së në këtë qytet, në momentin kur ata kanë brohoritur për Aleancën për Ardhmërinë e Kosovës dhe kryetarin e partisë, Ramush Haradinaj."

Incidenti në Deçan është më i rëndi gjatë fushatës për zgjedhjet lokale që mbahen të dielën.